Governu Timor-Leste

Iha Timor-Leste, funsionáriu kontratadu públiku ida bele sai hanesan funsionáriu permanente públiku liu  dei’t husi konkursu públiku. Esperiénsia no antiguidade servisu nian seidauk sai nu’udar pasaporte ida atu tama ba kuadru estadu nian sira. Hanesan ezemplu, Liborio Pereira, Prezidente Komisaun ba Funsaun Públika (KFP) fó hanoin fali kona-ba aprovasaun, iha fulan Janeiru tinan ida ne’e liu husi Konselu Ministru, iha “ Rezolusaun kona-ba abertura konkursu públiku ba integrasaun iha Rejime Jerál kareira nian iha Administrasaun Públiku ba traballadór kontratadu sira ba tempu ne’ebé determina tiha ona ne’ebé mak ezerse funsaun hanesan profesór sira iha sistema edukasaun no Ensinu Pré-Eskolár , Báziku no Sekundáriu iha Timor-Leste”.

Komisaun ba Funsaun Públika dadaun ne’e  prepara hela proposta ida hodi aprezenta iha Konsellu Ministru “ hodi hatama funsionáriu temporáriu sira ne’ebé servisu liu tinan tolu iha funsaun públika, sai funsionáriu permanente ”, hatutan Prezidente KFP.

Liborio Pereira hateten faktu ne’ebé mak eziste funsionáriu kontratadu barak liu funsionáriu permanente sira, ne’e problema ida ne’ebé mak tenke rezolve”, hatutan mós katak “se ita kontinua ho situasaun hanesan ne’e, ita sei iha administrasaun públiku ne’ebé mak  ladun efisiente, tanba laiha direitu hanesan entre funsionáriu permanente ida ho funsionáriu kontratadu ida.Iha momentu saida de’it funsionáriu temporáriu ida bele husik tiha nia kargu hodi buka situasaun ida ne’ebé mak seguru liu ba nia”.