Governu Timor-Leste

Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano ASSANAMI Sabino, lidera sorumutuk ida ho Ministra Saúde, Ministru Ensinu Superiór, Siénsia no Kultura, Reitór Universidade Nasionál Timor Lorosa’e (UNTL) no reprezentantes husi Brigada Médika Kubana iha Timor-Leste, hodi debate tranzisaun graduál Kursu Medisina Jerál nian. Sorumutuk ne’e hala’o iha Palásiu Governu, Dili, iha loron 18 fulan-marsu tinan 2024. 

Liuhusi deklarasaun ba imprensa, Magnífiku Reitór UNTL, João Soares Martins, esklarese katak objetivu prinsipál husi sorumutuk ho Vise-Primeiru-Ministru, Ministru Koordenadór Asuntus Sosiais ne’e, mak atu koordena tranzisaun graduál Kursu Medisina Jerál husi Brigada Kubana ba UNTL.

“Hahú husi tinan 2005, Brigada Kubana apoia ona implementasaun Kursu Medisina Jerál, ne’ebé forma ona médiku timoroan na’in-1.155 to’o ohin loron, no distribui ona ba territóriu tomak. Agora maka momentu oportunu atu ita avansa ho prosesu tranzisaun ida-ne’e”, afirma Reitór UNTL. 

Durante sorumutuk ne’e, Vise-Primeiru-Ministru orienta UNTL atu prepara kondisaun nesesária sira ba transferénsia rekursus umanus, nune’e mós ba adekuasaun kurríkulu no infraestruturas Fakuldade Medisina nian.

Daudaun ne’e, Fakuldade Medisina oferese kursu Enfermajen, Medisina Jerál, Obstetrísia, Nutrisaun, Farmásia no Siénsia Medika Laboratóriu, ho foku inisiál hosi tranzisaun ida-ne’e maka kona-ba kursu Medisina Jerál nian, iha ne’ebé Estadu Timor-Leste estabelese ona parseria ida ho profesór sira husi Repúblika Kuba, ne’ebé nu’udar responsavel ba ensinu no formasaun médiku iha país ne’e. Kolaborasaun ida-ne’e konta mós ho profesór timoroan na’in-sia ne’ebé formadu iha Kuba, ne’ebé kontribui ona hodi hanorin hamutuk ho médiku kubanu sira. Neineik-neineik, Governu espera katak timoroan maka sei fó formasaun médika ne’e, ho apoiu husi Brigada Kubana.

Vise-Primeiru-Ministru subliña importánsia husi prosesu tranzisaun ida-ne’e no anunsia formasaun husi ekipa interministeriál ida, ne’ebé sei inklui UNTL no Brigada Kubana, hodi halo preparasaun ne’ebé nesesária.

Mariano ASSANAMI Sabino afirma katak, “ita iha pontu importante tolu ne’ebé presiza konsidera, maka hanesan preparasaun kurríkulu, jestaun no hasa’e profisionalizmu rekursus umanus no adekuasaun infraestruturas”.

Vise-Primeiru-Ministru salienta tan importánsia infraestruturas no nesesidade atu forma rekursus umanus ho kualidade, liuliu ho envolvimentu Timor-Leste iha organizasaun Internasionál.