Diretór no Xefe Departamentu sira ne’ebé foun iha Ministériu Finansa nian
Diretór Lima no Xefe Departamentu na’in Hat simu pose iha Ministériu Finansa, iha loron 30 Jullu, hanesan konsekuénsia ida hosi reforma institusionál ne’ebé mak Ministériu ne’e hala’o hela hahú husi fulan Agostu 2007.
Diretór foun sira ne’e hetan nomeasaun ba Diresaun Nasionál Alfândega nian (Brígida da Silva), Diresaun Nasionál Jestaun ba Patrimóniu Estadu nian (Januário da Gama), Diresaun Nasionál ba Reseita Minarai nian (Mónica da Cruz), Diresaun Nasionál Efikásia Asisténsia Externa (José Abílio) no Diresaun Nasionál Estatístika (Elias Ferreira). Xefe Departamentu sira foun ne’e sei hetan kargu hirak iha Departamentu Auditoria Interna (Hermingardo Soares), Akompañamentu Asistênsia Externa (João Coimbra), Supervizaun Transferênsia Orsamentu nian sira (Leonardo Magno) no Apoiu Administrativu (Martinho Lopes).
Ministra Finansa afirma katak, maske sei iha vaga hirak seidauk preenxe maibé liu husi nomeasaun hirak ne’e mak nesesidade hirak esensiál Ministériu ninian bele ona kumpre, tanbá barak husi elementu sira foun ne’e hala’o tiha ona sira nia funsaun molok sira atu hetan nomeasaun ne’e.
Emília Pires koalia mós kona-ba importánsia husi nomeasaun rua ne’e. Nomeasaun ba Diretora Nasionál Alfândega nian, ne’ebé koinside ho inisiativa husi modernizasaun ne’ebé mak oras ne’e hala’o hela iha Servisu Alfândega nian sira iha Timor-Leste, hodi hakarak alkansa meta kona-ba “World Class Customs Organization”. No nomeasaun ba Departamentu Auditoria Interna nian, ne’ebé, tuir Ministra, sei kontribui ba atu hadia efikásia kona-ba uza orsamentu, nune’e mós atu habúras tan konfiansa ba iha relatóriu kona-ba finansiamentu, ba iha investigasaun kona-ba fraude sira no ba iha salvaguarda patrimóniu Estadu nian.
