Governu Timor-Leste

Primeiru-Ministru, Kay Rala Xanana Gusmão, hamutuk ho membru Governu balun, partisipa iha serimónia selebrasaun aniversáriu da-11 eleisaun Sua Santidade, Papa Francisco nian. Serimónia ne’ebé prepara husi Nunsiatura Apostólika Dili, hala’o iha Nunsiatura Dili, iha loron 15 fulan-marsu tinan 2024. 

Iha loron 13 fulan-marsu tinan 2013, tinan 11 liubá, Kardeál arjentinu Jorge Mário Bergoglio eleitu ba Kátedra Pedro, nu’udar Papa jezuita no latinu-amerikanu dahuluk, no eleitu hafoin renúnsia husi ninia antesesór. Nia hanesan Papa dahuluk ne’ebé hili naran Francisco.

Iha serimónia ne’e, Primeiru-Ministru Xanana Gusmão hato’o felisitasaun Timor-Leste nian ba Sua Santidade, Papa Francisco, no ko’alia-liu importánsia husi ninia pontifikadu no lideransa globál kona-ba pás, justisa no fraternidade umana. Primeiru-Ministru entrega fotografia simbólika ida ba Reprezentante Santa Sé iha Timor-Leste, Monseñór Marco Sprizzi, ne’ebé akompaña husi Prezidente Repúblika, José Ramos-Horta. 

Prezidente Repúblika, José Ramos-Horta, iha ninia diskursu durante selebrasaun, tranzmite gratidaun no felisitasaun Timor-Leste nian ba Papa Francisco, elojia ninia umildade, inkluzaun no servisu ne’ebé laiha kole ba umanidade. Xefe Estadu ko’alia-liu importánsia husi Deklarasaun kona-ba Fraternidade Umana Abu Dhabi iha tinan 2019, ne’ebé adota husi Parlamentu Timor-Leste hanesan prinsípiu orientadór nasionál. 

Timor-Leste daudaun ne’e prepara hela hodi hein vizita Papa Francisco nian mai país ne’e. Iha loron 12 fulan-fevereiru liubá, Monseñór Marco Sprizzi hateten katak, maske “seidauk bele konfirma data”, “Governu Timor-Leste halo hela preparasaun ida ne’ebé di’ak-tebes” no “lori Santa Sé nia naran” agradese “ba serbisu boot-tebes, exelente, kompetente no efisiente ne’ebé halo hela iha preparasaun ba eventuál vizita Papa nian mai Timor-Leste”.