Parlamentu Juventude
Eleisaun ba Parlamentu Foin-sa’e (Parlamentu Juventude) se hala’o hosi loron 29 fulan Juñu to’o loron 9 fulan Jullu tinan ida ne’e.
Kriasaun espasu ida kona-ba sensibilizasaun no inisiasaun ba klosan sira relasiona ho partisipasaun demokrátika no sívika nu’udar sidadaun, ne’e hetan fatin iha vizaun kona-ba dezenvolvimentu no kapasitasaun klosan timór-oan nian, ne’ebé mak promove hosi IV Governu Konstitusionál nian.
Inisiativa ida ne’e sai konkretu iha fulan Juñu tinan 2009, bainhira hala’o konsulta nasionál ida kona-ba matéria ida ne’e, no partisipa hosi reprezentante nain 13 hosi distritu sira. Liu tiha fulan hat, iha fulan Outubru tinan 2009, Konsellu Ministru aprova tiha Rezolusaun ne’ebé mak estabelese kriasaun Parlamentu Foin-sa’e nian.
“Misaun prinsipál Parlamentu Foin-sa’e nian mak atu buka tama iha polítika komunitária, maibé iha faze ida edukativa kona-ba informasaun no ezersísiu. Iha ne’e ita koalia kona-ba klosan hirak ne’ebé mak seidauk hetan otas ida permite sira atu hala’o direitu votu nian. Sira seidauk bele vota. Maibé sira bele hetan koñesimentu kona-ba móris nu’udar komunidade, sívil no edukativu atu nune’e sira bele prepara-an di’ak liután, basá sira mak sei sai mata-dalan país ida ne’e nian” esplika Diretór-Jerál Sekretaria Estadu Juventude no Desportu, José Luís de Pádua Oliveira.
Parlamentu Juventude ne’e mesak klosan de’it ne’ebé ho otas hosi tinan 12 to’o 17, ema hili sira ba períodu tinan rua nian. “Sei hili ema na’in rua hosi sub-distritu ida-idak. Ita iha sub-distritu 65, ne’e katak ninia totál hamutuk ema na’in 130 ne’ebé mak sei hili tuir dalan demokrasia nian”, hato’o tan hosi José Luís de Pádua Oliveira.
Sesaun plenária ba dahuluk hosi Parlamentu Klosan nian ne’e sei hala’o hafoin sura tiha votasaun no konfirmasaun hosi rezultadu votasaun nian ne’ebé mak remata tiha ona iha loron 9 fulan Jullu.
Kona-ba regularidade ba sorumutuk nian Diretór-Jerál Sekretaria Estadu Juventude no Desportu, dehan katak “Kestaun ne’e hetan ninia definisaun iha planu aktividade nian, maibé sei depende liu-liu ba fleksibilidade Komisaun Reguladora, Komissaun organizadora nian. Uluk nana’in, ita labele prejudika estudu klosan sira ne’e nian, basá barak liu hosi sira mesak ema estudante de’it. Ita tenki hili loron ne’ebé própriu ba eventu, sorumutuk no diskusaun hirak ne’e.”
Atu realsa tan katak Parlamentu Juventude nian ne’e mak “espasu aprendizajem no prátika ida kona-ba demokrasia ho ninia karáter permanente no la tuir partidu”. Governu mak sei estabelese estatutu, kompeténsia, forma, partisipasaun, organizasaun no funsionamentu hosi Parlamentu Juventude ne’e nian.
Ninia funsaun hirak espesífiku mak: dada klosan sia atu bele adopta atitude responsável ida iha sosiedade nia laran, la’os de’it ba sira nia hahalok rasik, mós ba hahalok ema seluk nian; informa kona-ba direitu, devér, liberdade garantia hirak fundamentál ne’ebé mak hamahon ema sidadaun sira; fo hatene kona-ba organizasaun podér politiku nian, órgaun soberania nian sira, kompeténsia no funsionamentu ida-idak nian no oinsá buat hirak ne’e fó oin ba malun; habrani klosan sira atu ezerse sira nia direitu tuir demokrasia no atu partisipa iha vida públika; forma klosan sira atu sai mata-dalan ida responsável; haburas sensibilidade sosiál; haburas kapasidade atu hato’o liafuan; halo klosan sira manan interese atu partisipa iha atu identifika no kompreende problema hirak kona-ba komunidade, nune’e mos atu aprezenta solusaun.
Iha segunda-feira, loron 16, fulan Agostu liu ba, hala’o iha Salão Delta Nova, inaugurasaun ofisiál ba Parlamentu Juventude nian ho prezensa ema boot sira mak hanesan, Sekretáriu Estadu ba Juventude no Desportu, Prezidente Parlamentu Nasionál, Reprezentante UNICEF iha Timor-Leste, Vise-Reprezentante UNMIT, Prezidente ba Konsellu Nasionál Juventude, Sekretária Estadu ba Promosaun Igualdade nune’e mós ho prezensa husi membru Governu no membru Parlamentu Nasionál sira seluk.
Hafoin liu tiha serimónia ne’e, hala’a mós sorumutu ida ho Prezidente Repúblika, iha Palásiu Prezidente nisn, tuir fali sira han kalan hamutuk iha instalasaun Sekretaria Estadu ba Juventude no Desportu.
Atu haree vídeo ida-ne’e, klik iha ne’e.
