Primeiru-Ministru destaka importánsia diálogu no promosaun pás iha Global Citizen NOW: Melbourne
Primeiru-Ministru, Kay Rala Xanana Gusmão, destaka nesesidade urjente ba diálogu no promosaun pás hanesan pilár fundamentál hodi halakon pobreza global, ne’ebé makas tebes, durante ninia partisipasaun iha abertura Global Citizen NOW: Melbourne, eventu ida ne’ebé halibur lider sira hosi Austrália no rejiaun Ázia-Pasífiku, iha loron 5 no 6 fulan-marsu, iha Melbourne, Austrália.
Iha ninia edisaun datoluk, Global Citizen NOW: Melbourne fó fatin ida ba ideia oioin, husikedas lider mundiál to’o ativista sira, hodi diskute kestaun krusiál sira hanesan alterasaun klimátika no pobreza globál. 
Xefe Governu partisipa iha painél abertura ho nia títulu “Hasoru Dezafiu Globál iha Ázia-Pasífiku”. Durante ninia intervensaun, Primeiru-Ministru Gusmão ko’alia kona-ba problema urjente ne’ebé komunidade vulneravel sira enfrenta iha mundu tomak, hodi husu sidadaun globál sira atu reflete hamutuk kona-ba oinsá atu promove mudansa mentalidade ida entre lider mundiál sira.
Xanana Gusmão partilla vizaun kona-ba papél g7+ nian, organizasaun ida ne’ebé funda hamutuk hosi Timor-Leste, ne’ebé halibur país sira ne’ebé iha situasaun konflitu ka pos-konflitu. Ko’alia-liu kona-ba kreximentu organizasaun nian, husikedas país inisiál hitu to’o país membru atuál 20, ne’ebé inklui país ikus ne’ebé adere ba organizasaun, mak Iemen, país ida ne’ebé funu durante tinan barak no ema barak mak haluha.
Primeiru-Ministru diskute kona-ba konflitu globál oioin hanesan trajédia iha Myanmar, hodi fó-énfaze ba nesesidade asaun hamutuk. Xefe Governu ne’e mós mensiona situasaun iha Gaza, Ukránia no país oioin iha Áfrika, hodi deklara katak estrema pobreza ne’e liga liu ba konflitu no husu komunidade internasionál hodi aumenta esforsu atu fasilita diálogu no evita funu. 
Xanana Gusmão halo mós apelu espesiál ida ba joven no ativista sira, hodi motiva sira atu kontinua luta ba mudansa mentalidade lider mundiál sira nian.
Relasiona ho kestaun ambientál, Primeiru-Ministru fó-énfaze kona-ba singularidade hosi illa Ataúru, ne’ebé lokaliza iha Timor-Leste, ne’ebé sai hanesan fatin ba diversidade boot-liu iha mundu. Xanana Gusmão konvida ema hotu-hotu atu vizita Ataúru no ko’alia-liu kona-ba prioridade adota medidas hodi proteje ambiente ne’e.
