Konstrusaun iha distritu Vikeke no distritu Kovalima
Entre fulan Juñu no Jullu Ministériu Infra-Estruturas hamutuk ho Institutu Jestaun Equipamentu hala’o servisu, liu-liu ba dezenvolvimentu rurál iha Distritu Vikeke no Distritu Kovalima.
Dezenvolvimentu rurál hirak ne’e hanesan loke no kanaliza bee-mota tuir nia dalan iha mota Alimbata, loke dalan emerjénsia tanba ponte aat ka kotuk ne’ebé hetan estragu sira hanesan, ponte Alimbata, ponte TEDE, ponte Kaisa Lulik ne’ebé liga Sub-distritu Uatulari ba Sub-distritu Uatukarbau iha Distritu Vikeke, loke estrada kilómetru 17 (17 km) iha Sub-distritu Fohorén liga ba Sub-distritu Fatululik iha Distritu Kovalima no mós loke tan estrada iha Lougoum liga ba Maukatar no Maukatar ba Lolotoe.
Objetivu dezenvolvimentu rurál hanesan xave ida ba IV Governu Konstitusionál, tanba importante atu redús ki’ak no mukit, haburas servisu no hasa’e produtividade iha setór agríkola, atu nune’e bele hasa’e kresimentu ekonómíku iha area rurál sira.
Iha vizaun no planu dezenvolvimentu rurál hosi Ministériu Infra-Estruturas ba futuru mak hanesan proposta atu aumenta tan Orsamentu Estadu ba programa dezenvolvimentu área rurál sira nune’e bele hadi’a infra-estrutura bázika, identifika no klasifika infra-estrutura sira públika iha área rurál no área urbanu ne’ebé iha risku la di’ak, prepara planu no estratéjia ne’ebé efisiente no hadi’a administrasaun no jestaun ba projetu Estadu atu nune’e bele alkansa servisu nomós programa seluk ne’ebé planeadu tiha ona.
