Sekretaria Estadu Igualdade no parseiru sira lansa atividade prevensaun no resposta ba violénsia bazeia ba jéneru
Sekretária Estadu Igualdade, Elvina Sousa Carvalho, hamutuk ho Diretór interinu Ajénsia Estadus Unidus ba Dezenvolvimentu Internasionál (USAID, akrónimu iha lian inglés) iha Timor-Leste, Mark Anthony White, no parseiru sira seluk, lansa ofisiálmente atividade ida ho nia títulu “Hakotu Barreira, Harii Moris Di’ak: Resposta Integrada ba Violénsia Bazeia ba Jéneru iha Timor-Leste.” Serimónia lansamentu ne’e hala’o iha loron 6 fulan-marsu tinan 2024, iha Timor Plaza, Dili. 
Organizasaun naun governamentál Hamnasa-Hamutuk Nasaun Saudavel sei implementa atividade ida-ne’e durante tinan haat oinmai, iha munisípiu Ermera, Likisá, Kovalima no Bobonaru, ne’ebé foka liu ba prevensaun no resposta ba violénsia bazeia ba jéneru.
Durante ninia intervensaun, Elvina Sousa Carvalho, ko’alia-liu kompromisu Sekretaria Estadu Igualdade nian iha promosaun igualdade jéneru, ho objetivu atu halakon diskriminasaun no kombate ba violénsia kontra feto no labarik-feto sira. 
Lori Governu Konstitusionál da-9 nia naran, Sekretária Estadu kongratula ONG HAMNASA ba vizaun no misaun hodi implementa atividade ida-ne’e. Nia mós ko’alia-liu nesesidade kooperasaun entre entidade sira hotu, iha tarefa difisil ida-ne’e hodi kombate violénsia no promove igualdade jéneru.
Sekretária Estadu ne’e mós ko’alia-liu importánsia polítika governamentál hodi hametin papél feto iha setór ekonómiku hanesan parte ba esforsu atu ultrapasa dezafiu ne’ebé feto sira enfrenta no promove moris ida ne’ebé dignu no independente kompara ho mane sira. 
Mark White, husi USAID, espresa orgullu boot ba parseria ho ONG HAMNASA no felisita Governu ba adosaun Lei Kontra Violénsia Doméstika tinan 2010, Planu Asaun Nasionál Tinan Sanulu kona-ba Violénsia Bazeia ba Jéneru nomós medida importante sira seluk ne’ebé ho objetivu atu responde ba violénsia bazeia ba jéneru iha país ne’e.
Diretór interinu USAID ne’e ko’alia-liu katak, violénsia bazeia ba jéneru maka kestaun globál ida ne’ebé sériu afeta la’ós de’it Timor-Leste, maibé mundu tomak, nia reafirma kompromisu USAID nian hodi apoia instituisaun nasionál sira iha prevensaun no resposta ba Violénsia Bazeia ba Jéneru. 
Serimónia lansamentu ne’e konta ho prezensa husi Ministériu Saúde, parseiru dezenvolvimentu, prezidente husi munisípiu haat ne’ebé envolve -Ermera, Likisá, Bobonaru no Kovalima, no konvidadu sira seluk.
