Prosesu rekrutamentu Funsionáriu Públiku
Iha Timor-Leste, fó sai vaga servisu nian ba Funsaun Públika halo liu husi jornál sira nomós husi rádiu, fó sai mós iha kuadru avizu nian iha repartisaun distritál sira. Ami hili ona dalan atu uza teknolojia fóun maibé “seidauk iha garantia katak ema hotu-hotu ne’ebé bele sai hanesan kandidatu iha asesu ba internet. Tanba ne’e, ami sei uza métodu ne’ebé tradisionál liu” esplika Libóriu Pereira, Prezidente ba Komisaun Funsaun Públika.
Hafoin fó sai tiha avizu, iha prazu legál ida durante loron sanulu, hahú husi loron fó sai avizu, atu sira ne’ebé iha interese bele kandidata-an. Prosesu selesaun ba funsionáriu sira kompostu husi faze barak. Uluk liu mak, painél juri nian ida sei halo análize ba dokumentu sira ne’ebé kandidatu sira entrega, atu garante katak dokumentu hirak ne’e prienxe rekizitu hotu ne’ebé iha. Lista kona-ba kandidatu hirak ne’ebé liu selesaun sei publika hodi fó sai data kona-ba pasu tuir mai : prova hakerek, ne’ebé sei hala’o iha Dili hafoin loron lima. Tuir prezidente KFP nian, prazu loron lima ida ne’e la’ós de’it serve “atu ema sira ne’ebé naran tama iha lista bele hatene katak sira liu selesaun no iha ezame eskritu nian ba sira atu halo, maibé mós atu sira ne’ebé naran la tama lista bele halo reklamasauan”. Kandidatu sira ne’ebé hetan klasifikasaun porsentu 60 ba leten mak bele liu faze ida ne’e. Faze datoluk prosesu selesaun nian mak entrevista, iha faze ida ne’e mós kandidatu sira tenke hetan klasifikasaun ida, ki’ik liu mak porsentu 60. Libóriu Pereira hatutan tan katak, “iha rekrutamentu nia laran, faze hotu sai hanesan eliminatória, ida ne’e katak, sira ne’ebé la liu iha faze selesaun dokumentu nian, labele ba oin”. Ida ne’e mós mak akontese iha entrevista profisionál. Objetivu regra ida ne’e nian mak atu garante kualifikasaun ema sira ne’ebé atu sai funsionáriu”.
