Prezidente EDTL Partisipa iha Semináriu kona-ba Tranzisaun Klimátika no Enerjia Moos durante Simeira ASEAN-Austrália
Prezidente Komisaun Ezekutiva EDTL, EP, Paulo da Silva, partisipa hanesan oradór iha Semináriu Internasionál kona-ba Tranzisaun Klimátika no Enerjia Moos ne’ebé realiza iha loron 4 fulan-marsu tinan 2024, iha ámbitu Simeira komemorativa ba da-50 aniversáriu parseria diálogu Austrália ho ASEAN nian, ne’ebé realiza iha Sentru Konvensoins no Espozisoins Melbourne, Austrália. 
Semináriu ida-ne’e halibur lider no espesialista sira husi rejiaun ne’e hodi diskute estratéjia país sira ASEAN no Austrália nian hodi hasoru dezafiu globál relasiona ho alterasaun klimátika no tranzisaun ba enerjia sustentavel, nune’e kontribui ba meta globál neutralidade karbonu to’o tinan 2050.
Prezidente EDTL, Paulo da Silva, fahe esperiénsia Timor-Leste nian ho partisipante sira iha semináriu ne’e kona-ba setór enerjia, no ko’alia-liu kompromisu, polítika no asaun sira ne’ebé país adota iha ninia perkursu husi enerjia konvensionál ba enerjia renovavel. 
Paulo da Silva aprezenta perfíl atuál enerjia nasionál nian, liuliu polítika públika Timor-Leste kona-ba enerjia renovavel no meta sira ne’ebé estabelese ona atu promove prátika sira ne’ebé sustentavel liu. Aborda mós asaun konkreta sira ne’ebé ho objetivu atu implementa diversifikasaun enerjia renovavel iha Timor-Leste, nune’e mós obstákulu no dezafiu ne’ebé país hasoru iha prosesu ida-ne’e. Esplora mós posibilidade kooperasaun entre país sira ASEAN no Austrália nian, hodi aselera tranzisaun enerjia husi fontes la renovavel ba renovavel no hodi hametin lasu kolaborativu iha inisiativa globál importante ida-ne’e. 
Prezidente Komisaun Ezekutiva EDTL salienta katak, tuir Planu Estratéjiku Dezenvolvimentu Nasionál (PED) tinan 2011-2030, Timor-Leste hakarak atu hetan pelumenus 50% husi ninia nesesidade enerjia liuhusi fontes renovaveis. Ba ida-ne’e, Timor-Leste daudaun ne’e implementa hela sistema fotovoltaikus ho kapasidade 72MW-85MW, nune’e mós planu dezenvolvimentu sistema anin no bee hodi prodús enerjia.
Nia informa mós katak 99% husi suku iha territóriu nasionál hetan ona asesu ba eletrisidade no prevee atu alkansa 100% iha tinan 2024, ka tarde liu iha inísiu tinan 2025. 
