Governu asina kontratu ho Emprezáriu atu implementa Projetu Pakote Dezenvolviventu Desentralizadu (PDD)
Governu, liu hosi Ministru Administrasaun Estatál no Ordenamentu do Territoriu (MAEOT), iha segunda-feira, loron 2 fulan Agostu, partisipa serimónia asina kontratu entre emprezáriu ho Administradór Distritu nu’udar Kordenadór Ekipa Konjunta Distritál ba projetu Pakote Desenvolvimentu Desentralizadu iha distritu Ainaru (PDD).
Objetivu prinsipál hosi PDD ne’e hanesan konfiansa ida ne’ebé governu sentrál fó ba setór privadu sira iha nível distritu atu dezenvolve rasik sira nia rain liu hosi projetu PDD ne’ebé iha.
“Sentidu ida hosi PDD ne’e mak iha kontrolu sosiál, signifika katak envolvimento Xefe Suku iha Equipa Konjunta Distritál (EKD) atu fasilita sira tau matan direta hodi kontrola projetu sira nebe’e iha nia suku laran hahú kedas hosi inisiu, la’os projetu to’o tiha ona klaran mak foin kontrola.” Ministru Administrasaun Estatál no Ordenamentu Territóriu, Arcangêlo Leite, hateten iha serimónia lansamentu PDD ne’e.
Membru Governu ne’e mós husu ba emprezáriu sira atu implimenta projetu sira ne’e ho loloos hodi kumpri ba kontratu no kalendáriu. Tuir kalendáriu loron 31 fulan Dezembru 2010, projetu sira ne’e tenki hotu ona, maibé karik bele projetu sira ne’e hotu molok loron ne’ebé determinadu ona, atu nune’e bele fasilita prosesu pagamentu ba emprezáriu sira mós lalais, hatutan Ministru.
Iha fatin hanesan Administradór Distritu Ainaru, Manuel Pereira, hateten katak : totál projetu iha Distritu Ainaru iha tinan fiskál 2010, hamutuk 21, ho nia totál orsamentu dólar amerikanu millaun ida atus neen. Dezafiu ne’ebé ami enfrenta mak krítika sira hosi emprezáriu sira ne’ebé lahetan projetu hateten katak EKD servisu laloos, familiarizmu, laiha justisa, laiha transparénsia, sira halo keixa to’o nasionál. Totál kompañia iha distritu Ainaru hamutuk 55, maibé 39 de’it mak hetan klasifikasaun ba kategoria A, B, C, no D.
Administradór mós apela ba komunidade tomak liu-liu ba emprezáriu sira hotu atu fó susesu ba PDD iha Distritu Ainaru. Ba emprezáriu sira ne’ebé hetan projetu husu atu implimenta projetu sira ne’e ho didi’ak no responsabilidade tomak atu bele fó benefisiu ba komunidade tomak.
