Ministru Administrasaun Estatál fó pose ba Gregório Saldanha nu’udar Prezidente Autoridade foun ba Munisípiu Dili
Ministru Administrasaun Estatál, Tomás do Rosário Cabral fó pose ba Gregório da Cunha Saldanha “Mouris”, nu’udar Prezidente Autoridade foun ba Munisípiu Dili, iha loron 1 fulan-marsu tinan 2024. 
Gregorio Saldanha hetan nomeasaun husi Primeiru Ministru Kay Rala Xanana Gusmão, tuir proposta Ministru Administrasaun Estatál, liuhusi despaxu n.16/GPM/II/2024, loron 28 fulan-fevereiru, hodi troka Guilhermina F.S Ribeiro, ne’ebé okupa ona knaar ne’e dezde tinan 2021.
Durante ninia diskursu simu-pose, Prezidente Autoridade foun Munisipiu Dili nian rekoñese dezafius ne’ebé iha, ba jestaun sidade ida ne’ebé komplexa no destaka presiza halo mudansa. 
Gregorio Saldanha kompromete katak nia sei serbisu maka’as ho funsionáriu sira hotu autoridade munisipál Dili nian atu koordena serbisu ho autoridades postu nian husikedas suku to’o aldeia sira, no kolabora ho autoridade governamentál no naun-governamentál sira, ho objetivu atu hetan solusaun ba problemas no promove dezenvolvimentu nasionál ida ne’ebé lais no metin, iha kapitál ida ne’ebé seguru, furak no ho moris-di’ak. 
Serimónia simu-pose ne’e konta mós ho prezensa membrus Governu, Komandu Polisia Munisípiu Dili, reprezentantes husi korpu diplomátiku, parseirus dezenvolvimentu no sosiedade sivíl.
