Komisaun Funsaun Públika nia Aniversáriu dahuluk
Komisaun Funsaun Públika (KFP) kompleta tinan ida ona nia ezisténsia. Komemorasaun ba aniversáriu, iha loron 15 fulan Jullu, hala’o ho aprezentasaun kona-ba ninia imajen korporativa no projetu kona-ba ninia servisu-fatin iha tempu oin mai.
Ba prezidente Komisaun Públika nian, balansu atividade ne’ebé dezenvolve ona iha fulan 12 uluk ne’e funsiona ho pozitivu. Maske nune’e, Libóriu Pereira hatutan katak: “Ita hotu hatene dezafiu hirak ne’ebé ita hasoru atu harii Funsaun Públika ida ne’ebé efisiente liu, iha Timor-Leste.”
Iha ninia funsionamentu iha tinan ida uluk ne’e, KFP simu kazu dixiplinár 110, kazu 26 husi kazu hirak ne’e hetan ona konkluzaun, kazu 40 iha hela faze instrusaun nian. “keixa ka alegasaun hirak ne’ebé ami simu, barak liu, iha relasaun ho la tama servisu (durante fulan ida resin). Lei hateten katak falta, durante loron 21 tuituir malu konsidera ona hanesan abandona servisu. Nu’udar baibain, kestaun dixiplinár sira submete ba Komisaun husi Ministériu sira no órgaun Administrasaun Públika nian sira seluk, Inspesaun Jerál, Ministériu Públiku no entidade sira seluk, hanesan Provedoria Direitu Umanu no Justisa” Liboriu Pereira esplika.
Relatóriu finál ne’ebé Komisaun tenke aprezenta ba Parlamentu Nasionál no Governu, iha fulan Marsu nia rohan iha kada tinan, entrega tiha ona. “ To’o oras ne’e seidauk iha resposta, nein iha reposta husi Parlamentu Nasionál nune’e mós husi Governu. Ami rasik mak aprezenta relatóriu ne’e, ba Parlamentu Nasionál no ba Primeiru-Ministru. Sira promete mai ami katak sei iha sesaun plenária ida atu deputadu sira bele rona rasik husi Komisaun. To’o ohin loron, ami hein hela resposta” Prezidente KFP nian afirma.
