Governu Timor-Leste

Primeiru-Ministru, Kay Rala Xanana Gusmão, hamutuk ho membru Governu Konstitusionál da-9 nian balun, partisipa iha serimónia resepsaun diplomátika anuál, ne’ebé realiza husi Prezidente Repúblika, José Ramos-Horta, iha Palásiu Prezidensiál Nicolau Lobato, iha loron 20 fulan-fevereiru tinan 2024.

Ho tema “Hametin Parseria, Promove Kolaborasaun”, eventu ne’e halibur embaixadór sira husi país amigu, rezidente no naun-rezidente sira iha Timor-Leste, ho propózitu atu hametin relasoins diplomátikas no kooperasaun entre Timor-Leste no ninia país amigu sira. 

Iha diskursu abertura, Prezidente Ramos-Horta espresa ninia gratidaun ba amizade no apoiu kontínuu husi país parseiru Timor-Leste nian iha tinan naruk. Ko’alia-liu kona-ba importánsia parseria internasionál iha dezenvolvimentu nasaun nian, hodi afirma katak, “eventu sira hanesan resesaun ohin-loron nian, fó oportunidade ida hodi rekonekta, hametin lasu amizade no kooperasaun nian ne’ebé vitál tuir ita-nia nasaun ne’ebé sei joven kontinua nia dezenvolvimentu.” 

Primeiru-Ministru, Xanana Gusmão, iha ninia diskursu, agradese ba Prezidente Ramos-Horta tanba halibur ona embaixadór sira husi país amigu oin-oin. Nia ko’alia-liu kona-ba importánsia hosi okaziaun hanesan ida-ne’e atu “konstroi relasaun, ko’alia livre no aprende hamutuk”, nune’e mós “oportunidade ida hodi diskute polítika no prioridade Governu Konstitusionál IX nian”, “eleitu hodi dezenvolve ita-nia país no kria empregu no oportunidade ba ita-nia povu”. 

Xefe Governu foka-liu ba nesesidade kooperasaun internasionál no hametin relasaun bilaterál, salienta esforsu Governu nian hodi hadi’a infraestruturas, diversifika ekonomia no promove setór sira hanesan saúde no edukasaun. 

Xanana Gusmão termina ninia diskursu ho apelu ida ba promosaun diálogu no diplomasia, hodi destaka katak, maske ho dezafiu globál, buska ba kompriensaun entre nasaun sira, buka pontus komuns no promosaun pás maka fundamentál.