Jorge Alves “We Moris” simu pose nu’udár Diretór Ezekutivu AMRT
Iha loron 21 fulan-fevereiru tinan 2024, Jorge Alves “We Moris”, simu pose nu’udár Diretór Ezekutivu Arkivu & Muzeu Rezisténsia Timorense (AMRT) IP, husi Vise-Ministru Asuntus Parlamentares, Adérito Hugo da Costa, ne’ebé reprezenta Ministru Prezidénsia Konsellu Ministrus, Agio Pereira. Serimónia ne’e hala’o iha instalasaun AMRT nian, iha Dili. 
Nomeasaun ba Jorge Alves, aprova iha sorumutuk Konsellu Ministrus iha loron 6 fulan-fevereiru tinan 2024, hafoin termina iha fulan outubru liubá, mandatu husi membrus atuál Diresaun nian, inklui Diretór Ezekutivu anteriór, “Hamar” Antoninho Baptista. 
Iha Rezolusaun Governu nian ne’ebé estabelese nomeasaun ida-ne’e, esplika katak maske “Hamar” Antoninho Baptista Alves dezempeña papél fundamental ida iha kriasaun no jestaun AMRT nian, Governu hatene katak daudaun ne’e maka tempu ne’ebé loloos atu hahú faze foun ida, hodi introdús perspetiva inovadora ho lideransa Jorge Alves nian, veteranu no antigu kombatente Rezisténsia ne’ebé iha perfíl, koñesimentu no esperiénsia ne’ebé kualifika nia atu asume funsaun diresaun iha servisu públiku.
Governu espresa mós ninia louvór no apresiasaun ba serbisu ne’ebé dezempeña ona husi “Hamar” Antoninho Baptista, durante tempu naruk hodi ezerse funsaun hanesan dirijente iha AMRT.
Iha ninia intervensaun hafoin asume kargu ne’e, Jorge Alves “We Moris” kompromete atu kontinua misaun AMRT ho responsabilidade no fó kontinuidade ba serbisu sira ne’ebé la’o hela. Diretór Ezekutivu foun AMRT ne’e hato’o ninia agradesimentu ba Diretór sesante ba servisu boot ne’ebé hala’o ona, liuliu iha jestaun arkivu no prezervasaun ba dokumentus rezisténsia nian. 
Diretór ezekutivu sesante, “Hamar” Antoninho Baptista Alves, iha ninia intervensaun hanoin filafali katak durante tinan ruanulu ikus ne’e hasoru difikuldade barak, maibé konsege alkansa metas maske iha dezafiu persistente sira. Nia enkoraja mós Diretór foun atu kontinua' esforsu sira ne’ebé la’o hela, haree ba objetivus AMRT nian, ho foku liu ba prezervasaun istória no dokumentus rezisténsia nian.
