Ministru Administrasaun Estatál hala’o vizita ofisiál ba Portugál hodi hametin kooperasaun iha área desentralizasaun, kestaun eleitorál, dijitalizasaun no modernizasaun administrativa
Ministru Administrasaun Estatál, Tomás do Rosário Cabral, termina ona vizita ofisiál ida ba Portugál iha loron 15 fulan-fevereiru tinan 2024, iha ne’ebé realiza sorumutuk estratéjiku oioin ho governante, prezidente autoridade munisipál no reprezentante husi instituisaun portugeza sira seluk, ho objetivu atu hametin kooperasaun bilaterál iha área desentralizasaun, kestaun eleitorál, dijitalizasaun no modernizasaun administrativa. 
Ho objetivu atu hakle’an kolaborasaun entre país rua ne’e, Ministru Tomás Cabral hala’o sorumutuk ho Sekretáriu Estadu Dijitalizasaun no Modernizasaun Administrativa, Mário Campolargo, no ho responsavel sira husi Ajénsia ba Modernizasaun Administrativa, nune’e mós ho Ministra ba Koezaun Territoriál, Ana Abrunhosa, Ministru Negósius Estranjeirus Portugál, João Cravinho, no Prezidente Instituto Camões, IP, Ana Fernandes. 
Ministru Tomás Cabral diskute mós tema sira ne’ebé iha relasaun ho administrasaun munisipál ho prezidente autoridade munisipais portugés, inklui Prezidente Kámara Munisipál Figueira da Foz, Pedro Santana Lopes, no Prezidente Kámara Munisipál Cascais, Carlos Carreiras. Sorumutuk ikus, ne’ebé hanesan parte ida husi protokolu kooperasaun entre munisípiu Cascais no Vikeke, diskute aspetu interkámbiu ekonómiku, kulturál no edukativu nian, nune’e mós promove lian portugés iha Timor-Leste. 
Ministru mós halo sorumutuk ida ho Sekretáriu-Jerál Uniaun Sidade Kapitál Lian Portugés (UCCLA, akrónimu iha lian portugés) Vítor Ramalho, no reprezentantes husi Kámara Munisipál Lizboa. Iha kontestu ida-ne’e, analiza progresus hosi projetu “Parseria ba Reforsu Governasaun Urbana, Inkluzaun Sosiál no Promosaun Empreendedorizmu iha Dili, Timor-Leste”, ne’ebé finansia husi Uniaun Europeia no ezekuta husi UCCLA, Autoridade Munisipál Dili no Kámara Munisipál Lizboa (CML, sigla iha lian portugés). 
Durante ninia estadia iha Portugál, Ministru Tomás Cabral hala’o mós sorumutuk ho Sekretáriu Ezekutivu CPLP, Zacarias da Costa hodi debate ajenda komún kona-ba dezafiu ba dijitalizasaun no modernizasaun administrativa no kestaun eleitorál. 
