Governu Timor-Leste

Sentru Nasionál Empregu no Formasaun Profisionál (CNEFP, sigla iha lian portugés), iha Tibar, Munisípiu Likisá, iha loron 21 fulan-fevereiru tinan 2024, sai hanesan fatin ba serimónia lansamentu programa "Kompeténsia Agroflorestál ba Empregu no Reziliénsia", ne'ebé lidera husi Sekretáriu Estadu Formasaun Profisionál no Empregu, Rogério Araújo Mendonça, hamutuk ho Embaixadór Uniaun Europeia, Marc Fiedrich, no reprezentante husi Organizasaun Internasionál Traballu (ILO-akrónimu iha lian inglés), Diego Rei. 

Programa ne'e, ho orsamentu dolar amerikanu millaun 6,5 sei implementa durante tinan haat husi ILO, ho kolaborasaun ne’ebé metin ho Sekretaria Estadu Formasaun Profisionál no Empregu. Objetivu prinsipál mak atu loke tan oportunidade empregu ne'ebé iha kualidade no dezenvolve empreendedorizmu iha área agroflorestál, ho atensaun espesiál ba jovens, liuliu feto foin-sa’e, no migrantes ne'ebé fila mai nasaun ne’e. 

Sekretáriu Estadu Rogério Araújo Mendonça, hato’o ninia esperansa "katak projetu Kompeténsia Agroflorestál ba Empregu no Reziliénsia, ne'ebé lansa agora ne’e, sei fó insentivu signifikativu ba foin-sa’e sira atu tama iha setór ne'e, ho objetivu atu hetan rendimentu atrativu ne’ebé promove tantu sira-nia partisipasaun nune’e mós dezenvolvimentu iha setór privadu". 

Marc Fiedrich, husi Uniaun Europeia, subliña katak, nia fiar "projetu ne'e sei kontribui ba aumentu númeru foin-sa’e no feto sira ne'ebé hetan benefísiu husi formasaun profisionál, nune’e permite sira hetan serbisu ka harii sira-nia negósiu rasik iha nasaun ne’e". Nia mós destaka importánsia hosi inisiativa ida-ne'e "ba diversifikasaun ekonomia iha Timor-Leste, no promove kreximentu rendimentu iha área rurál sira".

Hafoin lansamentu ne’e, partisipante sira, inklui reprezentante hosi korpu diplomátiku, parseiru dezenvolvimentu, administrasaun públika, no akadémiku, kuda ai-kameli hamutuk 30 iha Unidade Produsaun no Demonstrasaun Agríkola CNEFP nian.