Konsellu Ministrus aprova ona Medida sira atu Proteje Legalidade Urbanístika
Konsellu Ministrus, iha sorumutuk husi loron 21 fulan-fevereiru tinan 2024, aprova projetu Proposta Lei, ne’ebé aprezenta husi Ministru Obras Públikas, Samuel Marçal, kona-ba Medida sira atu Proteje Legalidade Urbanístika.
Ho vigora rejime jurídiku ba edifikasaun no urbanizasaun, ne’ebé regula lisensiamentu ba konstrusaun no utilizasaun ba edifísiu sira, nune’e Governu presiza atu-fó ferramenta legál ho loloos hodi bele garante aplikasaun rejime ida ne’e.
Tanba ne’e, projetu Proposta Lei ne’e iha objetivu atu estabelese medidas atu proteje legalidade urbanístika, regula aktu administrativu nesesáriu ne’ebé garante hodi kumpre lejizlasaun kona-ba lisensiamentu operasaun urbanístika, edifikasaun, nune’e mós hodi kumpre ba instrumentu jestaun territoriál nian.
Liuhusi proposta Lei ida-ne’e sei aplika medida lima atu proteje legalidade urbanístika – embargu, demolisaun (sobu) obra, despeju administrativu, sesasaun ba uzu no prosedimentu legalizasaun – ne’ebé sei permite Governu atu atua no hadi’a legalidade urbanístika, no konsidera grau gravidade ilísitu urbanístiku no obra ne’e bele legaliza ka labele.
Proposta Lei ne'e sei submete ba diskusaun no votasaun husi Parlamentu Nasionál.
