Konsellu Ministrus rekomenda akizisaun ba kaderneta pasaporte rihun 150 no mákinas impresaun pasaporte nian
Konsellu Ministrus, iha sorumutuk loron 21 fulan-fevereiru tinan 2024, rekomenda ona ba Ministru Justisa hodi halo prosedimentu aprovizionamentu ho ajuste diretu atu sosa kaderneta pasaporte rihun 150 no mákina impresaun pasaporte nian rua, ho objetivu atu garante fornesimentu ba tinan sira tuirmai. 
Governu Konstitusionál IX, husikedas nia simu pose, asume ona kompromisu atu solusiona problema falta pasaporte.
Tuir desizaun Konsellu Ministrus iha loron 27 fulan-setembru tinan 2023, hahú ona prosesu aprovizionamentu ida atu halo adjudikasaun urjente ba kaderneta Pasaporte Eletróniku. Iha fulan-outubru, pakote dahuluk kaderneta pasaporte nian to’o ona Timor-Leste, no husikedas ne’ebá, entrega ona kaderneta balun, nune’e hodi asegura fornesimentu ne’ebé presiza ba tinan 2024. 
Aleinde ne’e, iha loron 18 fulan-janeiru tinan 2024, Ministériu Justisa, liuhusi Diresaun-Jerál Servisus Rejistu no Notariadu, lansa ona aplikasaun ida kona-ba ajendamentu ‘online’, atu hasa’e efisiénsia no efikásia servisu, iha tempu hanesan atu evita ema bou-malu iha fatin atendimentu.
