Governu Timor-Leste

Uniaun Europeia (UE) aprezenta ona lansamentu ba Projetu Integrasaun Rejionál no Komérsiu, hamutuk ho Vise-Ministra ba Asuntus ASEAN, Milena Rangel, no Ministru Komérsiu no Indústria, Filipus Nino Pereira, iha loron 15 fulan-fevereiru tinan 2024, , iha Ministériu Negósius Estranjeirus no Kooperasaun, Dili. 

Projetu ida-ne’e, ho finansiamentu hamutuk euro millaun 3 (dolar amerikanu millaun 3,23), implementa hela husi Sentru Komérsiu Internasionál iha parseria ho Governu Timor-Leste, no ho objetivu atu fó asisténsia téknika no kapasitasaun ba Timor-Leste iha ámbitu prosesu adezaun ba Asosiasaun Nasoins Sudeste Aziátiku (ASEAN) no ba Organizasaun Mundiál Komérsiu (OMK).

Timor-Leste, reprezenta husi Vise-Primeiru-Ministru, Francisco Kalbuadi Lay, sei asina protokolu adezaun ba OMK  durante konferénsia ministeriál organizasaun nian ba da-13, ne’ebé sei hala’o husi loron 26 to’o 29 fulan ida-ne’e, iha Abu Dhabi.

Durante lansamentu ne’e, Vise-Ministra ba Asuntus ASEAN, Milena Rangel afirma katak “Timor-Leste fiar iha potensiál komérsiu hanesan forsa ne’ebé halo impulsiona hodi promove kreximentu ekonómiku no dezenvolvimentu, hasa’e padraun moris no promove objetivu estabilidade, pás no governasaun di’ak”. 

 Diretora-Jerál Adjunta Departamentu Ázia no Pasífiku ba Servisu Europeu Asaun Esterna Uniaun Europeia nian, Paola Pampaloni, salienta katak UE kompromete ona hodi apoia “Timor-Leste iha promosaun dezenvolvimentu sustentavel liuhusi diversifikasaun ekonómika no kualifikasaun ba rekursus umanus”.

Vizita Paola Pampaloni nian ne’e hanesan parte husi diálogu dahuluk parseria estratéjikaho Timor-Leste, hafoin asinatura ba akordu Samoa, iha fulan-novembru liubá,  ne’ebé substitui akordu Cotonou.