Governu Timor-Leste

Ministériu Negósius Estranjeirus no Kooperasaun, iha kinta-feira ida-ne’e, loron 15 fulan-fevereiru tinan 2024, hala’o diálogu importante ida kona-ba parseria estratéjika entre Timor-Leste no Uniaun Europeia (UE). Sorumutuk ida-ne’e marka reuniaun dahuluk entre parte sira husikedas asinatura “Akordu Samoa” iha loron 15 fulan-novembru tinan 2023, ne’ebé estabelese kuadru jurídiku globál ba relasaun bilaterál entre UE no Estadus Áfrika, Karaíbas no Pasífiku iha tinan 20 oin-mai. 

Objetivu prinsipál husi sorumutuk ne’e mak atu hametin lasu entre Timor-Leste no UE, no Uniaun Europeia reafirma ninia kompromisu atu kontinua fó apoiu ba Timor-Leste iha área atuasaun oioin, hanesan nutrisaun, saúde, edukasaun, infraestruturas, ekonomia, seguransa, dijitalizasaun, alterasaun klimátika, direitus umanus no prosesu eleitorál.

Durante sorumutuk ne’ebé dirije husi Ministru Negósius Estrajeirus no Kooperasaun, Bendito dos Santos Freitas, no Reprezentante husi UE ba Rejiaun Ázia no Pasífiku, Paola Pampaloni, halo avaliasaun ba progresu sira ne’ebé alkansa hosi programa sira ne’ebé implementa no halo planu ona ba programa prioritáriu sira ba futuru. 

Ministru Bendito Freitas koalia-liu kona-ba importánsia husi diálogu ida-ne’e hanesan oportunidade ida hodi diskute área kooperasaun polítika, sosiál no ekonómika nian, no destaka tan katak parseria entre Timor -Leste no UE existe ona iha tempu naruk, dezde inísiu konstrusaun Estadu to’o ohin-loron. 

Diretora Jerál Adjunta Departamentu Ázia no Pasífiku ba Servisu Europeu Asaun Esterna Uniaun Europeia nian, Paola Pampaloni, hateten katak, diálogu ne’e ho objetivu atu halo revizaun ba kooperasaun bilaterál no identifikasaun oportunidade ba tinan hirak tuir-mai. “UE kompromete atu mantein ninia apoiu ba Timor-Leste iha setór oioin, inklui ekonomia no dezenvolvimentu sustentável”, nia afirma. 

Diálogu Parseria ne’e konta ho prezensa husi Ministru Negósius Estranjeirus no Kooperasaun, Vise-Ministra ba Asuntus ASEAN, Milena Rangel, Vise-Ministra Finansas, Felícia Claudinanda da Cruz Carvalho, Embaixadór Uniaun Europeia iha Timor-Leste, Marc Fiederich, no reprezentante sira husi liñas ministeriais Governu Konstitusionál IX.