Governu asina akordu subvensaun anuál ho Konferénsia Episkopál Timorense
Governu, liuhusi Gabinete Apoiu ba Sosiedade Sivil ne’ebé reprezenta husi Vise-Primeiru-Ministru no Ministru Koordenadór Asuntus Sosiais, Mariano Assanami Sabino, no Konferénsia Episkopál Timorense (CET-sigla iha lian portugés), ne’ebé reprezenta husi Arsebispu Arkidioseze Metropolitana Dili, Dom Virgílio do Carmo da Silva, SDB, formaliza ona asinatura ba akordu subvensaun anuál, iha serimónia ida ne’ebé hala’o iha loron 15 fulan-fevereiru tinan 2024, iha Palásiu Governu, Dili. 
Akordu ida-ne’e define atribuisaun, husi parte Governu, ho subvensaun públika ida korrespondente ba valór totál dolar amerikanu millaun sanulu-resin-lima, ba tinan finanseiru 2024, hodi hala’o atividades iha área edukasaun, sosiál no governu ekleziál nian. 
Akordu ida-ne’e hala’o bazeia ba konkordata ne’ebé asina ona iha loron 14 fulan-agostu tinan 2015, entre Repúblika Demokrátika Timor-Leste no Santa Sé, ne’ebé estabelese kuadru jurídiku kona-ba relasaun bilaterál entre País rua ne’e no Akordu-Kuadru ne’ebé asina iha loron 16 fulan-juñu tinan 2017 entre Governu no CET. Akordu sira ne’e prevee kontribuisaun anuál ida, tuir Governu nia disponibilidade finanseira, ba atividade sira ho karakter sosiál, edukativu no governu ekleziál Igreja Katólika nian. Kuantitativu no modalidade konsesaun ba subvensaun, sei regula kada tinan liuhusi akordu espesífiku entre Governu no Konferénsia Episkopál Timorense. 
Akordu ne’ebé daudaun ne’e asina, prevee katak pelumenus husi valór subvensaun 50% sei utiliza ba objetivu sira ho karakter edukativu no pelumenus 25% utiliza ba objetivu ne’ebé ho karakter sosiál.Prevee mós katak la liu husi valór 15% sei utiliza ba objetivu governu ekleziál nian no másimu 10% sei gasta ba jestaun subvensaun ne’ebé fó.
