Timor -Leste partisipa iha Konferénsia Oseanu Índiku ba da-7
Ministru Negósius Estranjeirus no Kooperasaun, Bendito dos Santos Freitas, partisipa iha Konferénsia Oseanu Índiku ba da-7 iha Perth, Australia, iha loron 9 no loron 10 fulan-fevereiru tinan 2024. Eventu ne’e halibur delegadu atus haat resin hosi territóriu hotu-hotu iha Oseanu Índiku inklui governante sira, akadémiku no organizasaun multilateral sira, ho objetivu sentrál mak atu diskute maneira pozitiva no prátika hodi serbisu ba Oseanu Índiku ida ne’ebé hakmatek, estavel no prósperu. 
Konferénsia ne’e, ho tema “Dalan ba Oseanu Índiku ida ne’ebé Estavel no Sustentável”, ne’ebé prepara plataforma diálogu ida entre Estadu sira rejiaun ne’e nian, ho objetivu kooperasaun, negosiasaun no prosperidade entre Estadu sira. Diskute mós dezafiu komún hirak ne’ebé rejiaun ne’e hasoru, hanesan seguransa, alterasaun klimátika, saúde oseanu, seguransa marítima, komérsiu no dezenvolvimentu ekonómiku, ho objetivu atu hetan solusaun hamutuk. 
Ministru Bendito Freitas partisipa ho ativu iha konferénsia ne’e, tuir sesaun plenária no painél ba diskusaun, ne’ebé kontribui mós ba debate kona-ba kolaborasaun entre nasaun illa sira hodi salvaguarda rekursus oseániku komún no kona-ba forma kooperasaun ba interese hamutuk atu asegura rejiaun ida ne’ebé hakmatek no moris-di’ak iha futuru.
Aleinde konferénsia ne’e, Ministru Bendito Freitas realiza mós reuniaun bilateral ida ho Ministra Negósius Estranjeirus Austrália nian, Penny Wong, iha ne’ebé destaka importánsia no relasaun ne’ebé metin entre Timor-Leste no Austrália. Ministru ko’alia-liu mós katak nasaun rua ne’e iha istória no valór demokrasia nian sira ne’ebé hanesan, apoiu ba direitus umanus no direitu internasionál. 
Durante partisipasaun Ministru nian iha Konferénsia Oseanu Índiku ba da-7 ne’e, Ministru Bendito Freitas akompaña husi Embaixadora Timor Leste nian iha Australia, Inês Almeida no Diretór Nasionál ba Asuntus Ázia Asidentál no Oseanu Ministériu Negósius Estranjeirus no Kooperasaun.
