Governu Timor-Leste

Ministériu Saúde, iha loron 22 fulan-dezembru tinan 2023, asina akordu ida ho Programa Alimentár Mundiál Nasoins Unidas (PAM) kona-ba akizisaun Ai-han Nutritivu Espesializadu (SNF, sigla iha lian inglés) ho objetivu atu kombate deznutrisaun ba inan isin-rua no inan-fó-susu sira.

Ministériu Saúde sei finansia, ho valór dolar amerikanu rihun 600, ba akizisaun tonelada métrika 380 resin iha tinan 2024 liuhusi PAM. Tuirmai, Ministériu Saúde sei distribui rekursu hirak-ne’e ba inan isin-rua no inan-fó-susu rihun 10 resin iha munisípiu 13 ne’ebé enfrenta menus ai-han nutritiva, hodi kombate deznutrisaun aguda no krónika.

Ministra Saúde, Élia A. A. dos Reis Amaral, hateten katak “ho disponibiliza ai-han espesializadu liuhusi Sentru Saúde Komunitáriu sira, Governu Timor-Leste sei hadi’a nutrisaun ba inan isin-rua no inan-fó-susu iha momentu ida ne’ebé krusiál ba dezenvolvimentu sira-nia oan sira nian”.

Alba Cecilia Garzon Olivares, Reprezentante PAM nian iha Timor-Leste, bolu atensaun ho faktu katak feto no labarik feto sira ne’ebé ho idade fertil maka afetada liu ba menus ai-han nutritivu iha país ne’e. Ida ne’e, tanba mós impaktu husi COVID-19, ai-han folin sa’e no xoke klimátiku, halo feto sira hetan risku ba deznutrisaun ne’ebé aas liu.

Nia mós hateten “PAM nia satisfasaun atu kolabora ho Ministériu Saúde hodi ajuda hatán ba lakuna ida-ne’e no apoia futuru ida ne’ebé saudavel liu ba inan no labarik sira iha Timor-Leste”.

Inisiativa ida-ne’e hanesan parte integrante ida liuhusi estratéjia nasionál ida ne’ebé boot liu hodi kombate deznutrisaun krónika no alkansa meta zero hamlaha to’o tinan 2030.