Governu Timor-Leste

Ministru Negósius Estranjeirus no Kooperasaun, Bendito dos Santos Freitas, akompaña Prezidente Repúblika, José Ramos Horta, durante ninia vizita ofisiál ba Índia hodi partisipa iha Simeira Vibrant Gujarat Globál tinan 2024 ba da-10, ne’ebé hala’o iha loron 10 to’o loron 12 fulan-janeiru tinan 2024, iha Estadu indianu Gujarate.  

Objetivu prinsipál sira husi vizita ida-ne’e inklui promosaun oportunidade negósiu no investimentu sira iha Timor-Leste, nune’e mós reforsu relasaun diplomátika ho Índia. Relasaun bilaterál entre Timor-Leste no Índia ne’ebé hahú iha tinan 2003, no iha Simeira ASEAN-Índia, iha fulan-setembru tinan 2023 foin lalais ne’e, Primeiru-Ministru Narendra Modi anunsia kriasaun ba misaun permanente ida entre Índia no Timor-Leste, nune’e mós iha tempu besik Timor-Leste mós sei estabelese embaixada ida iha kapitál indiana. 

Simeira ne’e organiza husi Governu Gujarat ne’ebé parseria ho Konfederasaun Indústria Indiana (CCI - Sigla iha Inglés) no iNDEXTb, Simeira Vibrant Gujarat Globál tinan 2024 ba da-10 ne’ebé halibur lider globál, desizór polítiku no espesialista sira indústria nian hodi diskute no esplora oportunidade sira ba dezenvolvimentu sustentavel, kreximentu ekonómiku no kooperasaun internasionál. Ne’ebé hahú iha tinan 2003, eventu ida-ne’e hala’o tinan rua dala-ida.

Prezidente Ramos Horta, iha ninia diskursu iha eventu ne’e, espresa gratidaun ba Primeiru-Ministru Índia nian, Narendra Modi, ne’ebé organiza forum ida-ne’e ne’ebé ho objetivu atu kataliza negósius , fahe koñesimentu no parseria estratéjika sira. Ko’alia-liu kona-ba damen no estabilidade ne’ebé eziste iha Timor-Leste, ninia klasifikasaun pozitiva iha liberdade imprensa no ninia papél iha organizasaun internasionál sira. Prezidente konvida investidór sira atu investe iha país ne’e, ne’ebé ko’alia-liu kona-ba setór sira hanesan turizmu, enerjia renovável, infraestrutura sira, saúde no agrikultura.. Ko’alia mós vontade atu hametin relasoins ho Índia, ne’ebé destaka kolaborasaun bilaterál no kontribuisaun Índia nian ba estabilidade iha Timor-Leste, inklui apoiu iha dezenvolvimentu rekursus umanus ba ASEAN.  Hakotu ninia intervensaun ho esperansa katak simeira ida-ne’e sei promove parseria ne’ebé iha benefísiu ba dezenvolvimentu sustentavel globál no prosperidade hamutuk.   

Durante períodu ida-ne’e, Xefe Estadu no Ministru Bendito Freitas hala’o sorumutuk bilaterál ida ho Primeiru-Ministru Índia nian, Narendra Damodardas Modi, ho objetivu atu fortalese relasaun bilaterál sira entre Timor-Leste no Índia. Iha sorumutuk ne’e, diskute apoiu ba Timor-Leste iha setór sira hanesan saúde, teknolojia informasaun, bolsa estudu, nune’e mós posibilidade ba investimentu privadu sira, liuliu kultivu  sorgu (sorghum) no produsaun susubeen.