Primeiru-Ministru insentiva estudante timoroan sira iha Japaun atu dedika an ba estudu hodi kontribui ba dezenvolvimentu nasionál
Durante enkontru ho Asosiasaun Estudante Timoroan iha Japaun (AETJ), iha loron 15 fulan-dezembru tinan 2023, iha kapitál japoneza, Primeiru-Ministru, Kay Rala Xanana Gusmão, enkoraja estudante timoroan sira iha Japaun atu aproveita didi’ak sira-nia oportunidade estudu hodi prepara sira-nia an ho di’ak no kontribui ba dezenvolvimentu rekursus umanus Timor-Leste nian iha futuru. 
Xefe Governu ko’alia liu importánsia iha dixiplina, dedikasaun no kumpre ba regra sira ne’ebé universidade japoneza estabelese ona nune’e bele konklui sira-nia estudu ho susesu.
Primeiru-Ministru hato’o ninia agradesimentu ba inisiativa asosiasaun ida-ne’e nian hodi promove dixiplina entre estudante sira, destaka importánsia atu prezerva identidade kulturál timoroan nian no partilla identidade ne’e ho komunidade sira seluk.
Prezidente AETJ, Geovania Garret Mouzinho Freitas, husu apoiu ba organizasaun atividade sira asosiasaun nian, hodi promove kultura timoroan no kria plataforma ligasaun ida entre estudante sira iha atividade akadémika no atividade sira seluk. 
Asosiasaun ida-ne’e daudaun ne’e halibur estudante besik 42, entre sira ne’e balu benefisia husi bolsa Governu Timor-Leste nian no sira seluk husi Governu Japonés. AETJ ninia misaun maka atu sai plataforma apoiu ida ba estudante timoroan sira iha Japaun, hodi garante sira-nia susesu akadémiku, ultrapasa dezafiu ne’ebé sira hasoru durante estudu no promove Timor-Leste ba komunidade japoneza no komunidade internasionál. 
Embaixadór Timor-Leste iha Japaun, Ilidio da Costa Ximenes, hato’o agradesimentu ba enkontru ne’e no destaka kooperasaun ativa ne’ebé eziste entre estudante sira no Embaixada Timor-Leste iha Japaun, liuhusi partisipasaun atividade Embaixada nian hodi promove turizmu no kultura Timor-Leste nian.
Enkontru ne’e sura mós ho prezensa husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Vise-Ministra Asuntus ASEAN, Milena Maria da Costa Rangel, no ekipa protokolár Timor-Leste nian.
