Primeiru-Ministru sei partisipa iha Simeira Komemorativa ba Aniversáriu Amizade no Kooperasaun entre ASEAN no Japaun ba da-50
Primeiru-Ministru, Kay Rala Xanana Gusmão, ohin, loron 14 fulan-dezembru tinan 2023 hala’o viajen ba Tókiu, Japaun hodi partisipa iha Simeira Komemorativa Aniversáriu Amizade no Kooperasaun entre Asosiasaun Nasoins Sudeste Aziátiku (ASEAN) no Japaun ba da-50, ne’ebé sei hala’o husi loron 16 to’o 18 fulan-dezembru.
Simeira ida-ne’e ho objetivu atu selebra relasaun ne’ebé eziste ona husikedas tinan 1973, nune’e mós atu hametin lasu amizade no atu dezenvolve hamutuk vizaun ida ba futuru husi relasaun entre ASEAN no Japaun.
Durante vizita iha Japaun, Primeiru-Ministru sei akompaña husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Vise-Ministra Asuntus ASEAN no Embaixadór Timor-Leste nian iha Japaun. Sorumutuk bilaterál sira ne’e ajenda ona hodi diskute programa no inisiativa nian sira atu hametin amizade no kooperasaun bilaterál.
Primeiru-Ministru sei hala’o vizita kortezia ida ba Imperadór Japaun, Sua Majestade Naruhito, no sei partisipa iha enkontru ho reprezentante sira setór privadu japonés nian, inklui responsavel INPEX no Tsuneishi Shipbuilding.
Xefe Governu mós sei halo palestra ida iha Universidade Nasoins Unidas kona-ba susesu Timor-Leste nian iha prosesu ne’ebé estabelese ona fronteira marítima definitiva ho Austrália. Embaixada Timor-Leste iha Tókiu sei organiza sorumutuk ho estudante timoroan sira iha Japaun.
Iha Simeira ida ne’e, Primeiru-Ministru sei iha oportunidade durante Simeira ne’e, hodi agradese ba Japaun tanba sira nia apoiu kontínuu ba dezenvolvimentu infraestruturas no ekonomia Timor-Leste, nune’e mós atu reafirma pozisaun Timor-Leste nian kona-ba adezaun nu’udár membru plenu permanente ba ASEAN.
Relasaun entre Timor-Leste no Japaun hanesan parseiru estratéjiku reforsa ona liuhusi apoiu japonés nian ba dezenvolvimentu rekursus umanus iha Timor-Leste, ne’ebé abranje funsionáriu públiku, sosiedade sivíl, estudante, militár no polísia sira.
Simeira ASEAN-Japaun ba da-50 ne’e konta ho partisipasaun husi líder no xefe governu sira ASEAN, ne’ebé inklui Primeiru-Ministru Laos, Sonexay Siphandon (Prezidente Rotativu ASEAN), Prezidente Repúblika Indonézia, Joko Widodo, Primeiru-Ministru Brunei, Hassanal Bolkiah, Primeiru-Ministru Vietname, Pham Minh Chinh, Primeiru-Ministru Xina, Li Qiang, Primeiru-Ministru Austrália, Anthony Albanese, Primeiru-Ministru Singapura, Lee Hsien Leong, Vise-Prezidente Estadus Unidus, Kamala Devi Harris, Primeiru-Ministru Índia, Narendra Modi, no mós observadór internasionál sira.
