Governu Timor-Leste

Primeiru-Ministru, Kay Rala Xanana Gusmão, hato’o ninia apresiasaun no rekoñesimentu ba ekipa téknika Timor-Leste no Indonézia nian ba esforsu hodi konklui prosesu markasaun segmentu sira ne’ebé seidauk rezolve iha fronteira terrestre iha enklave Oekusi, liuliu iha Noel Besi - Citrana. Xanana Gusmão, hamutuk ho Gabinete Fronteiras Terrestres no Marítimas, promove jantár amizade ida ho ekipa husi país rua, iha Hotel Timor, Dili. 

Xefe Governu konsidera serbisu husi ekipa sira ne’ebé hala’o ona iha loron 20 to’o loron 27 fulan-novembru tinan 2023, hanesan vitória boot ida no konklui ho susesu ba segmentu sira ne’ebé seidauk rezolve iha Noel Besi-Citrana durante dékada rua hanesan konkista signifikativa ida atu salvaguarda soberania nasionál, fortalese seguransa no promove afinidade sósiu-kulturál, nune’e mós lori benefísiu sosioekonómiku ba país rua ne’e.

Embaixadór Roberto Soares, xefe ekipa téknika nasionál, agradese ba ema hotu ne’ebé envolve ona iha esforsu no dedikasaun durante tinan barak to’o prosesu negosiasaun nian konklui ho susesu. Sr.Embaixadór ne’e manifesta mós importánsia “ekipa rua hetan solusaun ida ne’ebé justa no konsistente” no afirma katak “Timor-Leste halo tuir ninia pozisaun hodi rezolve fronteira sira tuir direitu internasionál”. 

Xefe Ekipa Téknika Negosiasaun Indonézia nian, Embaixadór Abdul Kadir Jailani, hato’o ninia gratidaun ba Governu Timor-Leste ba apoiu ne’ebé simu ona durante prosesu ne’e.

Susesu iha konkluzaun husi serbisu tékniku ne’e loke dalan foun ba vizita ofisiál Primeiru-Ministru Xanana Gusmão nian ba Jakarta, Indonézia, iha inísiu tinan oin, iha ne’ebé hein katak sei asina akordu formál ne’e.