Governu Timor-Leste

Ministru Negósius Estranjeirus no Kooperasaun, Bendito dos Santos Freitas, akompaña Prezidente Repúblika, José Ramos-Horta, iha Konferénsia Nasoins Unidas kona-ba Alterasaun Klimátika tinan 2023 (COP28), iha loron 2 no 3 fulan-dezembru tinan 2023 iha Dubai, iha Emiradus Árabes Unidus. 

Ministru Bendito Freitas, iha ninia intervensaun iha Segmentu Altu Nivel Avaliasaun Globál iha COP 28, destaka importánsia husi meius implementasaun ba susesu Akordu Paris no presiza avaliasaun globál. Nia ko’alia mós kona-ba falla sira iha “mitigasaun, adaptasaun no lakon no estragu sira tanba falta meius implementasaun” no husu “país dezenvolvidu sira atu mobiliza dolar millaun rihun 100 no la falla iha sira-nia promesa sira hosi tinan 2023 to’o 2024, ho duplika sira-nia apoiu sai dolar millaun rihun 200 to’o tinan 2030”. 

Nia apela mós ba lider sira husi país dezenvolvidu sira atu bele “fó apoiu ba nasaun sira ne’ebé sei iha hela dezenvolvimentu ho dezenvolvimentu no implementasaun teknolojia verde atu bele adapta an ba mudansa klimátika”, ne’ebé “sei lori ita la’o hamutuk ho esperansa no otimizmu hodi kolabora no halo ita-nia planeta sai fatin ida ne’ebé di’ak liu no uma ne’ebé dura ba ema hotu, no ba futuru jerasaun sira”.

Ministru Negósius Estranjeirus no Kooperasaun partisipa mós iha sorumutuk paralelu ida, ne’ebé ko-organiza husi organizasaun inter-governamentál g7+ hamutuk ho Emiradus Árabes Unidus, ho tema “Reforsa Reziliénsia liuhusi Intensifikasaun ba Asaun Klimátika iha Ambiente ne’ebé Frajil no Afetadu tanba Konflitu”. Durante diskusaun sira ne’e, país membru sira husi g7+ konkorda atu kolabora ho Emiradus Árabes Unidus hodi aselera prosesu implementasaun asaun klimátika nian, liuhusi kontribuisaun finanseira husi parte país industrializadu ka dezenvolvidu sira, hodi kombate alterasaun klimátika no evita efeitu negativu ba país menus dezenvolvidu sira.

Prezidente Repúblika iha ninia diskursu saúda desizaun istórika atu operasionaliza fundu perda no estragu, no realsa nesesidade finansiamentu adisionál sira atu enfrenta impaktu hosi alterasaun klimátika. Xefe Estadu ne’e husu ba Organizasaun Mundiál Saúde (OMS) atu deklara Emerjénsia Saúde Públika ida ne’ebé sai Interese Internasionál. 

José Ramos-Horta destaka impaktu barak husi alterasaun klimátika iha Timor-Leste, hanesan inundasaun, rai-maran, rai-monu no aumenta nivel tasi nian, ne’ebé afeta ba agrikultura, seguransa alimentár no infraestrutura.

Na’i-ulun ne’e alerta mós ba ameasa sira hanesan peska ilegál no poluisaun husi plástiku ne’ebé Timor-Leste enfrenta no halo kompromisu nasionál ho dalan ida ba dezenvolvimentu karbonu ki’ik, ho prioridade ba enerjia renovável no ba reflorestamentu.