Ministra Justisa ho Komisáriu KAK diskuti Lei ne’ebé mak regula Polisia Investigasaun Kriminál
Ministra Justisa, Lúcia Lobato, ho Komisáriu Komisaun Anti-Korupsaun (KAK), Aderito de Jesus Soares, segunda-feira, loron 19 fulan Jullu, foin lalais ne’e diskuti lei Polisia Investigasaun Kriminál ne’ebé dadaun ne’e Governu prepara hela.
Ministra Justisa, Lúcia Lobato, hateten “Polisia Investigasaun Kriminál rasik hanesan buat ne’ebé mak sei falta iha setór justisa nian. Hanesan ita hotu hatene katak durante ne’e ita iha de’it seksaun investigasaun ki’ikoan ne’ebé iha instituisaun PNTL nia okos, tanba ne’e labele halo investigasaun kriminál ne’ebé di’ak”.
Polisia Investigasaun Kriminál hanesan mós ho tribunál konta nian tanba KAK labele halo buat ida bainhira laiha polisia ne’ebé ho kbiit rasik atu halo investigasaun, dehan Ministra.
Kona-ba tribunál konta nian Ministra esplika katak, “tribunál konta nian mak sei haree tanbasá mak gasta osan Estadu sira ne’e, nune’e nia mak sei haree osan ne’e gasta duni tuir buat ne’ebé PN aprova. Nune’e mós atu asina projetu bo’ot ruma tenki haruka ba tribunál konta nian atu haree uluk katak buat hotu halo tuir regra sira ne’ebé iha ka la’e”.
Tan ne’e bainhira seksaun ba tribunál konta nian hahú hala’o sira nia servisu sei garante katak dalan ba oin atu gasta orsamentu estadu halo di’ak hodi labele hamosu korupsaun, hatutan Ministra.
Iha fatin hanesan, Komisáriu Komisaun Anti-Korupsaun, (KAK) Adérito de Jesus Soares, hateten “Ita hotu hatene katak, oras ne’e dadaun governu prepara hela lei ba polisia investigasaun kriminál, tanba polisia investigasuan oras ne’e sei falta. Ho nune’e invetigasaun kriminál ne’ebé atuál hala’o hosi seksaun investigasaun kriminál nian ne’e ladún apoiu servisu Prokuradór hodi halo investigasuan ba kazu ne’ebé mosu antes lori ba tribunál.
