Governu Timor-Leste

Ministériu Solidariedade Sosiál hala’o serimónia inaugurasaun uma sosiál ba daneen iha distritu Baukau, Manatutu no Viqueque. Serimónia inaugurasaun uma sosiál iha distritu tolu ne’e, diriji hosi Ministra Solidariedade Sosiál, Maria Domingas Fernandes Alves, iha loron 23 fulan Jullu tinan 2010, ne’ebé konsentra hamutuk iha suku Vemase Villa, distritu Baukau.

Ba distritu Baukau, totál uma sosiál ne’ebé harii iha 34 ho orsamentu hamutuk 126.343,96 dólar amerikanu, distritu Vikeke iha uma 34, ho totál orsamentu hamutuk iha 136.000 dólar amerikanu no distritu Manatuto iha uma 35, orsamentu hamutuk ho montate 134.679 dólar amerikanu. Kompañia ne’ebé halo konstrusaun ba uma sosiál mak hanesan, Kompañia Uhakae hosi distritu Vikeke, Kompañia Planato Star hosi Baukau no Kompañia Maklaik Unipesoal hosi Manatutu.

“Uma ne’ebé oferese, sei fó duni ba sira ne’ebé presiza, no tenke utiliza ho didi’ak, atu nune’e bele dura ho tempu naruk. Nune’e mós apela ba Xefe suku sira ka autoridade distritál sira atu labele  kria  favoritizmu ba benefisiáriu sira, tanba sidadaun hotu-hotu iha direitu hanesan.” Hateten Ministra Solidariedade Sosiál, Maria Domingas Fernandes Alves, iha nia diskursu ba benefisiáriu no populasaun iha fatin refere.

Iha oportunidade ne’e mós Ministra informa katak, iha tinan 2011, Ministériu Solidariedade Sosiál sei kontinua hala’o polítika ida ne’e, ne’ebé explora liu hosi planu ba programa  konstrusaun Uma Sosiál.

Tuir dadu sira ne’ebé esplora ona iha Manuál Implementasaun Polítika Asisténsia Uma Sosiál hatudu katak, uma hirak ne’e harii iha distritu sira tomak, liu-liu iha sub-distritu ruanulu resin walu (28) no Suku limanulu (50). Nune’e, totál uma ne’ebé harii mak iha atus haat limanulu (450), no orsamentu ne’ebé prevee hamutuk, millaun ida rihun atus walu, dólar amerikanu ($1.800.000), hosi Orsamentu Jerál Estadu (OJE 2009).