Forum Internasionál Negósius: Parseria Estratéjika no Kompromisu Investimentu Loke Orizonte Foun ba Dezenvolvimentu Sustentavel
Forum Internasionál Negósius ne’e, hala’o iha Dili iha loron 23 to’o loron 24 fulan-novembru, sai hanesan momentu ida ne’ebé importante tebetebes ba dezenvolvimentu ekonómiku nasionál. Eventu ne’e organiza husi Governu Timor-Leste, liuhusi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Meiu Ambiente, Francisco Kalbuadi Lay, iha parseria ho Kámara Komérsiu no Indústria Timor-Leste (CCI-TL – Sigla iha lian Portugés), ne’ebé halibur emprezáriu rejionál husi ASEAN, Xina, Koreia Súl, Brazil no Estadu Unidus besik 700, aleinde ne’e emprezáriu nasionál besik 200.
“Forum Internasionál Negósius” ne’e ho tema “Deskobre Oportunidade Azul no Matak ba Investimentu ida ne’ebé Sustentavel”, nu’udar palku asinatura estratéjika, hodi fortalese parseria sira ne’ebé rezulta kompromisu signifikativu sira. Asina ona Memorandu Entendimentu ne’ebé inklui setór oioin, hanesan setór saúde, edukasaun, turizmu no indústria. Ho aprezenta oportunidade sira negósiu nasionál nian ba investidór estranjeiru sira, eventu ne’e realsa diversidade no potensiál ekonómiku país nian, nune’e mós promove transparénsia iha espozisaun prioridade nasionál nian sira ba dezenvolvimentu hodi orienta investimentu sira ne’ebé alínea ona ho meta governamentál sira. Interasaun entre investidór nasionál no estranjeiru sira promove parseria ne’ebé sólida atu dudu kreximentu nasionál ne’ebé sustentavel, nune’e estabelese baze ida ne’ebé metin ba investimentu sira iha tempu futuru.
Entre rezultadu prinsipál sira iha forum ida-ne’e maka kompromisu husi investidór estranjeiru sanulu atu investe iha setór oioin iha Timor-Leste. Kompromisu ne’e formaliza ona ho asinatura ba Memorandu Entendimentu entre Governu ho Kámara Komérsiu no Indústria Timor-Leste.
Ko’alia-liu kona-ba parseria ho empreza Guangdong Guofengyuan Holding Group, ne’ebé kompromete ona doasaun ba konstrusaun ospitál ida no ho Guangdong Lufeng Jinghai Industrial Co., Ltd., ne’ebé promete sei konstrui abitasaun ba família 20 iha Timor-Leste. Wenchang Heng Ye Industrial Co., Ltd. sei fornese bolsa estudu besik 200 iha Xina ba sidadaun timoroan sira, no mós empreza Hong Kong ne’ebé asume ona kompromisu atu oferese viatura 12 ba Ministériu Turizmu no Ambiente. 
CCI-TL asina ona memorandu ida ho empreza Carbon Foundation Country, husi Austrália, no ho empreza PT Dewata Sukses, iha parseria ho Suhurama Developer Unipessoal Lda, ba kriasaun manu-inan ne’ebé tau tolun.
Asosiasaun Emprezariál Feto Timor-Leste (AEMTT- sigla iha lian portugés) asina mós akordu ida ho Shenzhen Hesun Supply Chain Service Co., Ltd. iha setór peska no ho Jardine Botanical SDN, Bhd iha indústria kosmétika. Iha mós manifestasaun ba interese investimentu nian iha setór turizmu ho konstrusaun ba kompleksu oteleiru ida ho fitun 5, ho Sentru Konvensaun tuir padraun internasionál.
Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay, durante serimónia asinatura akordus ne’e, hato’o ninia satisfasaun ba parseria ne’ebé realiza ona entre emprezáriu nasionál no investidór estranjeiru sira, fó énfaze katak, husi memorandu sanulu ne’ebé asina ona, ida maka doasaun viatura 12, ospitál ida no bolsa estudu 200.
Vise-Primeiru-Ministru konklui hodi afirma katak, maske forum negósius ne’e nu’udar inísiu hosi jornada ida-ne’e, konfiansa ne’ebé hetan ona sei kuda ba futuru investimentu Timor-Leste nian no defende kontinuidade husi realidade eventu ne’ebé hanesan ho ida-ne’e hodi fortalese liután relasaun komersiál no investimentu.
Forum Internasionál Negósius fornese plataforma ida ne’ebé importante tebetebes hodi promove parseria no investimentu, fortalese perspetiva ekonómika país nian no loke odamatan ba futuru ida ne’ebé sustentavel.
