Vise-Ministru Edukasaun vizita bolseiru timór-oan sira iha Filipinas
Vise-Ministru Edukasaun, Paulo Assis Belo, hi’it an ba rai Filipinas, iha segunda semana ida ne’e, Jullu, atu analiza situasaun timór-oan hirak ne’ebé Governu Timor-Leste mak selu hodi estuda iha ne’ebá.
Vizita ne’e hahú ho sorumutu ida iha Embaixada Timor-Leste nian iha Manila, hodi hasoru malun entre Vise-Ministru, Adidu Edukasaun Embaixada nian no Embaixadór Timor-Leste nian iha Filipina. Asuntu prinsipál ne’ebé sira koalia mak kona-ba klasifikasaun ne’ebé mak bolsista sira hetan bainhira sira estuda iha ne’ebá iha tinan rua nia laran. Sorumutu ba daruak mak ho estudante timór-oan sira hotu hodi rona sira nia notas. Paulo Assis Belo fó hatene katak estudante na’in 109 mak hetan nafatin bolsa estudu, maibé sira nain sia, tuir nota ne’ebé mak sira hetan, sira tenki fila mai Timor-Leste. Maski nune’e, Vise-Ministru mós fó hatene katak Governu sei fó tan biban atu sira bele kontinua sira nia estudu no hadi’a fali sira nia notas.
Vise-Ministru Edukasaun husu ba estudante sira atu “hanoin tok ba realidade ida-ne’e: rekursus umanus kuandu di’ak, rai ne’e talvés di’ak liután. Tanba ne’e imi tenke esforsu imi nia an atu estuda, no Governo fó nafatin motivasaun atu imi nia futuru bele sai di’ak liután.”
Bolsista sira hosi Angel University, iha Manila, aproveita biban ida-ne’e atu aprezenta sira nia difikuldade. Sira nia difikuldade prinsipál mak kona-bá matéria ne’ebé sira hetan iha Universidade hirak Filipina nian, sira haree katak la hanesan ho matéria ne’ebé sira simu iha Timor-Leste. “Alunu Eskola Sekundária sira iha Filipina ne’e, sira estuda ona matéria hirak avansadu liu. Kompara ho matéria ne’ebé hanorin iha Timor-Leste, ita atrazadu liu”, bolsista ida koalia, no tenik tan: ”Estudante timór-oan balun ne’ebé estuda Engeñeria, maske sira haka’as an, maibé sira la hetan notas di’ak tanba koñesimentu la hanesan.”
Embaxadór Timor-Leste, Francisco Cepeda, apela ba estudante timór-oan sira ne’ebé escola namkari iha Universidade Filipina, atu badinas liután estuda hodi bele hetan notas di’ak ba imi nia futuru. “Governu fó nafatin korajen ba estudante sira atu estuda di’ak bainhira akaba ona imi nia estudu id- ne’e, imi fila ba Timór bele desenvolve Timór ba oin”, dehan Embaixadór.
