Governu Timor-Leste

Governu Timor-Leste reforsa Programa Nasionál Merenda Eskolár no fó pasu boot ida ba ai-han eskolár nian ne’ebé produz ona lokalmente, ho lansa livru foun ida reseita nian sira bazeia ba ingrediente sazonál no nutritivu sira ne’ebé produz ona iha rai-laran. Lansamentu ba livru reseita sira Merenda Eskolár ne’e hala’o iha Palásiu Prezidensiál Nicolau Lobato, iha sábadu, loron 25 fulan-novembru 2023.

Livru reseita nian sira ne’e rezultadu husi kooperasaun multiministeriál ho Nasoins Unidas, no lansa ona iha serimónia ida iha Palásiu Prezidensiál, hala’o husi Ministra Edukasaun, Dulce de Jesus Soares, hamutuk ho Ministra Saúde, Élia dos Reis Amaral, Vise-Ministru Fortalesimentu Institusionál Saúde, José dos Reis Magno no Ministru Agrikultura, Pekuária, Peska no Florestas, Marcos da Cruz, ho apoia husi Programa Alimentár Mundiál husi Nasoins Unidas (PAM) no empreza sosiál Agora Food Studio.

Hahú husi inísiu anu letivu foun tinan 2024 nian, labarik sira ho idade eskolár nian iha país laran sei simu ai-han tasak, sabór no saudavel, konfesionada tuir menu husi livru. Ementa sira ne’ebé aprezenta ona iha munisípiu ida-idak, kona-ba estudu nutrisionál, nia objetivu atu mellora nutrisaun labarik sira nian ho idade eskolár no promove sistema sira ai-han nian ne’ebé sustentavel no agrikultura iha nivel lokál.

Avalia ona reseita 65 ne’ebé aprezenta iha livru hodi garante katak atu fornese refeisaun eskolár nutritiva, asesível no atrativa, ne’ebé akumula ba grupu alimentár tolu: idratu karbonu ba enerjia, proteína ba kreximentu no vitamina no minerál sira hodi dezenvolve kognitivu no protesaun.

Iha nia intervensaun durante lansamentu, Ministra Edukasaun, Dulce de Jesus Soares, hateten katak “hanesan parte husi programa nasionál alimentasaun eskolár Governu nian, menu foun sira sei fortalese injestaun nutrisionál ba labarik sira iha momentu krítiku dezenvolvimentu sira-nia kakutak (hanoin), hasa’e sira-nia kapasidade no enerjia atu aprende no adquire koñesimentu no abilidade nesesária sira hodi hala’o sira-nia potensiál no kontribui ba dezenvolvimentu kapitál umanu país nian”.

Lansamentu ba livru reseita sira ne’e, sei reforsa ho formasaun ba ekipa sira jestaun eskolár, diretór eskolár, koordenadór, koziñeiru, manipuladór alimentasaun no agrikultór lokál nian sira. Formasaun ne’e sei apoia koñesimentu no orsamentu alimentasaun   eskolár sira ne’ebé kultiva ona internamente, sei liga ba eskola ho agrikultura lokál sira no sei subliña prátika sira seguransa alimentár nian.

Reprezentante PAM iha país, Cecília Garzon Olivares, afirma katak “refeisaun eskolár saudável sira ne’ebé bazeia ba ai-han lokál sira sei ajuda atu halakon má nutrisaun ne’ebé aas, koneta filafali labarik sira ho ai-han tradisionál Timor-Leste nian no apoia dezenvolvimentu kadeia alimentár lokál nian liuhusi alimentasaun eskolár kazeira”.

Programa Merenda Eskolár ne’e ho objetivu atu labarik sira ho idade eskolár bele atinje, independentemente ninia jéneru, defisiénsia ka estatutu sosiál. Daudaun ne’e, programa ne’e fornese refeisaun ba labarik sira ho idade eskolár besik rihun 292 000 kada loron letivu.  Livru reseitas Merenda Eskolár no formasaun ba Alimentasaun Eskolár Kazeira nian, finansia husi Fundu Nasoins Unidas ba Objetivu sira Dezenvolvimentu Sustentavel.