Governu Timor-Leste

Klosan atleta timór-oan sira atu partisipa iha edisaun dahituk Jogu Komunidade País sira ho Dalen Portugés (CPLP) ne’ebé sei hala’o hosi loron 29 Jullu no loron 7 fulan Agostu, iha kapitál Mosambike nian, Maputu.

Timor-Leste partisipa iha modalidade rua, tuir Diretór-Jerál Sekretaria Estadu Juventude no Desporto, José Luís de Pádua Oliveira, esplika: “ita partisipa iha téniz no atletizmu, ho atleta tolu ba modalidade ida-idak: iha téniz ita iha elementu mane tolu no atletizmo feto tolu”. Atleta timór-oan na’in neen iha jovem besik na’in Atus Lima mai hosi paíz walu ne’ebé tama iha Komunidade nia laran: Brazil, Angola, Kabu Verde, Guiné-Bisau, Mosambike, Portugál, Saun Tomé no Prínsipe no Timor-Leste.

Modalidade hirak ne’ebé mak atu joga mak andeból, atletizmu, basketeból, futeból, téniz iha kampu, voleiból iha tasi-ibun, desportu adaptadu hirak seluk tan. Kompetisaun ne’e ba de’it klosan sira ho otas to’o tinan 16. Ba paralímpiku sira, organizasaun hanaruk tan otas to’o tinan 20.

Loron sanulu nakonu mesak Jogu, hodi hala’o kompetisaun hahú tuku 8 dadeer, no hotu iha tuku 19, ho loron ida de’it ba deskansa. Maske nune’e, iha ona programa nia laran kona-ba kalan kultura nian ba partisipante paíz ida-idak nian. Kalan kultura Timor-Leste nian sei hala’o iha loron 5 fulan Agostu, iha loron molok taka eventu ne’e.