Governu Timor-Leste

Vise-Primeiru Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, ofisiálmente lansa Programa Nasionál "Ha'u-Nia Tasi, Ha'u-Nia Timor" iha serimónia ne'ebé hala'o iha loron 20 fulan-novembru tinan 2023, iha Jardim B.J. Habibie, iha Dili.

Programa Nasionál "Ha'u-Nia Tasi, Ha'u-Nia Timor" ninia objetivu atu promove konxiénsia koletiva kona-ba importánsia biodiversidade tasi nian. Haree liu ba prezervasaun no limpeza iha área tasi, programa ne'e la’ós haree de’it importánsia vitál rekursu tasi nian, maibé mós hakarak insentiva prátika sustentável ne'ebé bele hasa'e turizmu no promove ekonomia azúl iha nasaun, hodi hametin kompromisu nasionál ida-ne’ebé ho prevensaun ambientál no dezenvolvimentu sustentável. 

Durante serimónia lansamentu ne’e, Vise-Primeiru-Ministru esplika katak inisiativa ida-ne'e, promove husi Ministériu Turizmu no Ambiente, ho ninia objetivu mak atu promove konxiensializaun ba ema hotu katak tasi maka rikusoin boot nasionál nian.

Na’i-ulun ne’e afirma mós katak Governu sei fó prioridade ba elaborasaun Polítika Ekonomia Azúl iha Timor-Leste, atu promove kreximentu sustentável nasaun nian, liuhusi prezervasaun, konservasaun, no uzu sustentável ba ita-nia rekursu tasi nian, nune’e mós promosaun inisiativa no programa ne’ebé refere ba sustentabilidade ambientál, ekonómika no sosiál.

Serimónia ne'e konta ho partisipasaun husi Membru Governu balu, Autoridade Turizmu Timor-Leste, parseiru dezenvolvimentu, estudante no membru komunidade sira seluk.