Governu Timor-Leste

Primeiru-Ministru, Kay Rala Xanana Gusmão, iha loron 22 fulan- novembru, fó pose ba Agostinho Letêncio de Deus hanesan Prezidente no José Telo Soares Cristovão hanesan Komisáriu ba Komisaun Funsaun Públika (KFP-sigla iha lian tétun), iha serimónia ida ne’ebé maka hala’o iha instalasaun sira KFP nian.

Agostinho Letêncio de Deus, uluk okupa kargu hanesan Diretór-Jerál iha Institutu Nasionál Administrasaun Públika (INAP). José Telo Soares Cristovão, hala’o knaar  nu’udar Komisáriu Funsaun Públika nian entre tinan 2015 no 2020, ho indikasaun husi Parlamentu Nasionál no iha 2020 dezignadu Provedór-Adjuntu ba Asuntus Boa Governasaun ba Provedoria Direitus Umanus no Justisa.

Entidade rua ne’e, hato’o kumprimisu atu hala’o sira-nia knaar “ho másima izensaun, dedikasaun no responsabilidade no mantein nafatin konsiderasaun aas ba interese sira Estadu nian, Programa Governu no ba valór sira funsaun públika nian” no kompromete atu “servisu ba defeza bein públiku nian no servi ba komunidade no ba povu, ho izensaun, onestidade, profisionalizmu no korresaun, hodi salvaguarda interese aas nasaun nian.

Iha intervensaun Primiru-Ministru nian, ko’alia liu kona-ba nesesidade ba “reforma ida ne’ebé haree liubá Estadu nia interese” “atu korriji, konsolida no kondús ba dezenvolvimentu ekonómiku ba país no ba povu. Destaka mos ba importánsia atu iha “funsionárius di’ak no kualifikadu iha munisípiu idak-idak atu harii, hadi’a no hametin instituisaun sira Estadu nian”.

Prezidente no Komisáriu foun, hetan nomeasaun husi Konsellu Ministrus, iha sorumutuk loron 15 fulan-novembru 2023. Komisaun ne’e kompostu husi membru na’in lima, na’in rua eleitu husi Parlamentu Nasionál no na’in tolu hetan nomeasaun husi Governu, ne’ebé maka nomeia mos Prezidente. Komisáriu sira simu nomeasaun ba mandatu ida tinan lima nian.

Iha loron 3 fulan-outubru, Ministru Prezidénsia Konsellu Ministrus, Agio Pereira, fó pose ba Agapito da Conceição, atu hala’o knaar, iha rejime dedikasaun eskluziva, to’o loron 29 fulan-maiu tinan 2025, ba kargu Komisáriu Funsaun Públika, sigla iha lian portugés-CFP, ho indikasaun husi Parlamentu Nasionál, iha eleisaun loron 29 fulan-agostu 2023.

Komisaun Funsaun Públika, kria husi lei iha fulan Juñu 2009 hanesan entidade independente, enkarregadu atu asegura “funsaun públika ida ne’ebé ho polítika imparsiál, bazeia ba méritu no iha padraun sira ne’ebé maka elevadu ho profisionalizmu, iha kapasidade atu hala’o knaar husi Estadu no ba populasaun Timor-Leste”.