Governu Timor-Leste

Sekretáriu Estadu Asisténsia Sosiál no Dezastre Naturál (SEASDN), Jacinto Rigoberto Gomes de Deus, inaugura uma sosiál iha distritu Ainaro hamutuk 35 ne’ebé aloka ba suku hirak mak hanesan suku KASA iha 10, suku Mulo, sub-distritu Hatubuliku hamutuk 10 no ba Suku sira iha sub-distritu Hatudo iha 15, iha loron 17, segunda-feira.

“Hau husu ba benefisiáriu sira ne’ebé simu uma Sosiál ne’e, atu bele kuidadu ho didi’ak atu nune’e bele dura iha tempu naruk no ba iha komunidade ne’ebé hela besik iha fatin uma Sosiál, atu kolabora hodi tau matan hamutuk, nune’e uma ne’e labele hetan estragus,” hateten Sekretáriu Estadu Jacinto Rigoberto Gomes de Deus.

Iha okaziaun ne’e mós, Xefe Aldeia Kasa, Albino de Araujo, agradese barak ba Governu, ne’ebé aloka ona uma sosiál hamutuk 35 ba iha distritu Ainaro no populasaun iha Aldeia refere sente kontente teb-tebes tanba Governu oferese ona uma ba sira. Maske nune’e, xefe aldeia ne’e mós sujere atu iha tinan 2011, Governu preve nafatin orsamentu programa ne’e, atu nune’e labele hamosu inveja sosiál iha komunidade nia le’et.

Programa Uma Sosiál ne’ebé realiza tiha ona ne’e, jeralmente, ho nia objetivu mak atu redús ki’ak iha rai laran, hodi nune’e grupu vulnerável sira bele hetan mahon ida ne’ebé adekuadu, hetan protesaun, móris hakmatek, nomós móris ho dignidade nu’udar ema umana hanesan hateten ona iha Konstituisaun RDTL.

Akompaña iha inagurasaun ne’e Diretór Nasionál Asisténsia Sosiál, Amândio Amaral Freitas, nomós asisti hosi Administradór distrito, Adminsitradór sub-distritu sira, Xefe suku sira, Xefe aldeia sira  no populasaun iha fatin ne’ebá.