Governu Timor-Leste

Bainhira fila husi Illa Cook, Ministru Prezidénsia Konsellu Ministrus, Agio Pereira, hala’o vizita ofisiál iha Darwin, Austrália, no iha loron 16 fulan-novembru tinan 2023, hala’o sorumutuk rua iha Parlamentu Territóriu Norte (NT – sigla iha lian Inglés) Austrália, ho Mark Monaghan, Prezidente Asembleia Lejizlativa NT no Nicole Manison, Vise-Ministra-Xefe Governu NT, hodi diskute parseria estratéjika ne’ebé eziste entre Governu Timor-Leste no Governu NT. 

Akordu ne’e inklui setór estratéjiku oioin hanesan mobilidade laborál, komérsiu, negósiu, agrikultura, turizmu, petróleu no minerais, no área sira seluk tan. 

 Haree ba akordu parseria estratéjika ida-ne’e funsiona mós hanesan estensaun ba jestaun husi programa Mobilidade Laborál Pasífiku no Austrália (PALM – akrónimu iha lian Inglés), no iha sorumutuk tuirmai entre Ministru Agio Pereira no Pat Conroy, Ministru ba Dezenvolvimentu Internasionál no Pasífiku Governu Austrália nian, asuntu prinsipál ida iha sorumutuk ne’e maka mobilidade laborál no posibilidade atu aumenta númeru traballadór timoroan sira ne’ebé partisipa iha programa ida-ne’e. Ko’alia mós kona-ba vontade atu dezenvolve Programa Mobilidade Laborál hodi inklui área téknika no kualifikada sira, hanesan otelaria.

 Diskute mós kona-ba reforsu parseria entre Parlamentu Nasionál Timor-Leste no Asembleia Lejizlativa Territóriu Norte Austrália.