Governu Timor-Leste

Primeiru-Ministru, Kay Rala Xanana Gusmão, akompaña husi Ministra Finansas, Santina Cardoso, hala’o sorumutuk ida ho advogadu no diplomata norte-amerikanu Pierre-Richard Prosper, iha loron 27 fulan-outubru 2023, iha Ministériu Finansas. Sorumutuk ne’e nia objetivu maka atu diskuti atu diskuti kona-ba kolaborasaun entre Governu no Pierre-Richard Prosper iha área oin-oin, atu fó impulsu ba dezenvolvimentu nasionál. 

Pierre-Richard Prosper, maka espesialita amerikanu ida ne’ebé fó apoiu jurídiku ba país oin-oin, inklui Timor-Leste, ho foku iha fortalesimentu sistema públiku sira, iha área sira ekonomia, dezenvolvimentu infraestruturas, setór petrolíferu, finansas no setór sira seluk ne’ebé mak iha relasaun ho justisa. 

Iha tinan naruk nia laran, diplomata ne’e fó ninia apoiu ba Governu Timor-Leste kona-ba rezolusaun marítima no terrestre, bazeia ba prinsípiu sira direitu internasionál nian, nune’e mó hanesan reprezentante Repúblika Demokrátika Timor-Leste nian, kona-ba matéria sira investimentu no dezenvolvimentu infraestruras, iha setór petrolíferu. 

Primeiru-Ministru Xanana Gusmão, konsidera sorumutuk ne’e “pozitivu tebtebes”, hodi destaka liu ba importánsi partilla esperiénsia sira ne’e, ba susesu programas governamentais nasionais ne’ebé maka Governu hakarak implementa, durante ninia mandatu. Xefe Governu mos manifesta katak “ Pierre-Richard fundamentál tebtebes ba Timor-Leste, iha apoiu kona-ba kestaun legál sira no iha asuntu sira seluk” no ohin “diplomata ne’e, mai fali atu diskuti asuntus oin-oin ne’ebé maka ita presiza apoiu”. 

Pierre-Richard Prosper, destaka mos ba ninia relasaun naruk ne’ebé mak eziste ona ho Primeiru-Ministru no ho Timor-Leste, husi kedas ninia vizita ba dala-uluk iha tinan 1999. Nia afirma mos katak “objetivu, mak atu kontinua kolabora ho Governu, ho Primeiru-Ministru no ho Timor-Leste, ho objetivu atu apoia país ne’e, hodi avansa ba iha melloria kondisaun moris timoroan sira nian no ba kresimentu husi nasaun ne’e rasik.

Advogadu no diplomata norte-amerikanu konsidera katak “sorumutuk ne’e pozitivu”, “atu avalia oinsá atu bele kontribui no ajuda Timor-Leste, iha área oin-oin, liuliu, iha dezenvolvimentu infraestruturas, inklui komunikasoens, eskolas, hospitais, nune’e mos melloria ba setór justisa”.