Governu Timor-Leste

Ministru Prezidénsia Konsellu Ministrus, Agio Pereira, iha loron 8 fulan-novembru tinan 2023, hala’o sorumutuk bilaterál tolu iha tempu hanesan uainhira halo Sorumutuk ba da-52 Lider sira Forum Illa Pasífiku nian, ne’ebé sei kontinua to’o loron 10 fulan-novembru tinan 2023, iha Rarotonga, iha Illas Cook. 

Iha enkontru dahuluk, Ministru Agio Pereira hasoru-malu ho Georges Rebelo Pinto Chikoti, Sekretáriu-Jerál Organizasaun Estadus Afrikanus, Karaíbas no Pasífiku nian (OACPS).

Iha sorumutuk ida ne’e, diskute kona-ba traballu organizasaun ida-ne’e nian, iha ne’ebé Timor-Leste hanesan membru. Sekretáriu-Jerál OACPS informa mós katak Timor-Leste sei prezide Konsellu Ministrus OACPS nian, no lidera hamutuk iha sesaun ministeriál entre OACP no Uniaun Europeia (EU), ne’ebé sei hala’o iha Samoa, iha loron 14 no 15 fulan-novembru. 

Iha okaziaun ida ne’e, sei asina Akordu Parseria foun entre UE no OACPS. Akordu Samoa, ne’ebé ita hanaran, sei substitui Akordu Kotonou ida uluk. Akordu ne’e kompostu husi baze komún ida no protokolu rejionál tolu ne’ebé ho objetivu atu atende nesesidade espesífika sira iha rejiaun sira Áfrika nian, Karaíbas no Pasífiku.

Tuir mai sorumutuk ho Giorgio Silli, Subsekretáriu Estadu iha Ministériu Negósius Estranjeirus no Kooperasaun Internasionál Governu Itália nian, ne’ebé aborda lasu amizade ne’ebé hametin Itália ho Timor-Leste no kestaun sira kona-ba kooperasaun bilaterál.

Iha sorumutuk ikus loron ne’ebá, Ministru Prezidénsia Konsellu Ministrus, hasoru malu ho Pat Conroy, Ministru ba Dezenvolvimentu Internasionál no Pasífiku Governu Austrália nian. 

Durante sorumutuk, Governante sira ko’alia kona-ba ligasaun Pat Conroy nian iha tempu naruk hanesan ativista husi kauza timoroan nian durante luta ba libertasaun nasionál.

Haree katak Pat Conroy hanesan responsavel Governu Austrália nian liuhusi programa Mobilidade Laborál Pasífiku no Austrália (PALM, akrónimu iha lian inglés) no programa traballu sazonal, tema prinsipál ida husi enkontru ne’e maka mobilidade laborál no posibilidade atu aumenta númeru traballadór timoroan sira atu partisipa iha programa ida-ne’e, no mós vontade atu haburas liután Programa Mobilidade Laborál hodi inklui área téknika no kualifikada sira, hanesan otelaria.

Iha sorumutuk sira ne’e, Ministru Agio Pereira aprezenta mós prioridade prinsipál Governu Konstitusionál IX nian iha ninia mandatu.