Governu ho Nasoens Unidas investiga kazu isin-rua ba foin-sa’e sira iha distritu tolu
Ministru Edukasaun (ME) asina akordu ida ho Sekretária Estadu Promosaun ba Igualdade (SEPI) ho Fundu Populasaun ba Nasoens Unidas (FPNU), nian, iha loron 19 fulan Jullu, iha Dili hodi investiga insidénsia isin-rua ba foin-sa’e sira ne’ebé mak verifika ona iha distritu Ermera, Liquiça no Ainaro. Durante asinatura ba akordu ne’e Sekretária Estadu Promosaun ba Igualdade, Idelta Maria Rodrigues, hateten katak liuliu distritu sira ne’e, feto-raan sira barak liu mak hosik tiha sira nia eskola kompara ho mane sira, iha nível ensinu Sekundáriu.
Objetivu hosi investigasaun ne’e iha parte seluk, hodi identifika kauza ba problema hirak ne’e, no seluk tan hodi ajuda estabelese Polítika Ministériu Edukasaun hodi fó garántia katak feto-raan sira iha asesu ba eskola ne’ebé hanesan ho mane foin-sa’e sira. Nune’e mós fó garantia asesu ba eskola ba feto-raan isin rua sira, hodi fila mai kontinua estudu hafoin liu tiha tuur-ahi.
Ministru Edukasaun agradese ba tulun orsamentu hosi FPNU. Nia subliña tan katak importánte tebes atu haka’as-an hodi hetan solusaun ida ba problema hosik eskola. João Câncio Freitas fó hanoin katak, objetivu Governu hodi implementa eskolaridade obrigatóriu, prevee ona iha Konstituisaun Repúblika no Lei Baze Edukasaun nian.
