Timor-Leste partisipa iha Forum Enerjia Ázia no Pasífiku ba da-3
Sekretáriu Estadu Eletrisidade, Bee no Saneamentu, Santos Noronha, partisipa iha Fórum Enerjia Ázia no Pasífiku ba da-3 (APEF3, akrónimu iha lian inglés), ne’ebé hala’o iha Bankoke, Tailándia, iha loron 19 no 20 fulan-outubru tinan 2023. Eventu ne’e ho tema “Harii futuru enerjétiku ida ne’ebé seguru, sustentavel no interligadu ba Ázia no Pasífiku”.
APEF3 nu’udar plataforma ministeriál ida ne’ebé estabelese hodi promove kooperasaun rejionál iha área seguransa enerjétika no iha uzu sustentavel ba enerjia iha Ázia no Pasífiku. Fórum ida-ne’e reúne paízes-membrus oin-oin hodi buka solusaun ba dezafiu seguransa enerjétika no hodi promove dezenvolvimentu sustentavel. 
Durante APEF3 ne’e, partisipante sira analiza progresu ne’ebé atinje ona iha realizasaun Objetivu Dezenvolvimentu Sustentavel 7 (Enerjia asesivel no moos) iha rejiaun Ázia-Pasífiku no iha implementasaun Deklarasaun Ministeriál kona-ba Kooperasaun Rejionál iha Tranzisaun Enerjétika ba Sosiedade Sustentavel no Reziliente iha Ázia no iha Pasífiku, ne’ebé adota ona iha Forum Enerjia Ázia no Pasífiku Daruak nian, iha tinan 2018.
Iha ninia intervensaun, durante eventu ne’e, Sekretáriu Estadu Eletrisidade, Bee no Saneamentu, Santos Noronha, realsa katak “Timor-Leste alkansa ona progresu boot iha ninia buska ba Objetivu Dezenvolvimentu Sustentavel (ODS)”. Kona-ba ida-ne’e, nia destaka katak “estratéjia nasionál ida atu aselera implementasaun ODS” liuhusi “hamenus kustu enerjia, iha melloria fiabilidade no iha tranzisaun ba fontes enerjia renovável”. Nia mós subliña katak “mudansa ida-ne’e la’ós de’it ba ambiente ne’ebé di’ak, maibé mós bele fó benefísiu ekonómiku iha tempu naruk”.
Maske “Timor-Leste sei hasoru hela dezafiu tanba laiha kapasidade umana, infraestruturas no instalasoins hodi aselera setór enerjia renovável iha territóriu tomak”, Governante ne’e hateten kompromisu Governu Konstitusionál IX nian “atu kontinua investe iha fontes enerjia renovável hodi diversifika setór enerjétiku, hamenus dependénsia ba óleus pezadus, kustu produsaun eletrisidade nian no proteje ambiente”.
Santos Noronha informa mós katak realiza ona “estudu pré-viabilidade ba investigasaun potensiál enerjia renovável besik 450 MW husi enerjia eólika (anin), enerjia solár (loro) fotovoltaika no ídrika (bee), ne’ebé seidauk utiliza tomak no katak “Governu Timor-Leste lansa ona 100 MW Painél Solár no Sistema Armazenamentu Enerjia hanesan Produtór Independente Enerjia nian iha tinan 2023”.
