Governu Timor-Leste

Sekretáriu Estadu ba Formasaun Profisionál no Empregu, Rogério Araújo Mendonça, hasoru-malu ho Xefe Delegasaun Uniaun Europeia nian, Marc Fiedrich, iha instalasaun Sekretaria Estadu, iha Dili.

Tópiku prinsipál husi diskusaun iha enkontru ida ne’e maka kolaborasaun iha kampu formasaun agroflorestál iha Timor-Leste. Durante sorumutuk ne’e, Marc Fiedrich aprezenta inisiativa balu ne’ebé hala’o hela husi Uniaun Europeia iha Timor-Leste, ho foku espesiál liu ba atividade sira ne’ebé iha relasaun ho agroflorestál.

Programa kooperasaun ne’ebé diskute durante sorumutuk ne’e ho objetivu atu promove dezenvolvimentu sustentável setór agroflorestál nian, ne’ebé haree liu bá kapasitasaun foin-sa’e sira no melloria produtividade. Parseria entre Uniaun Europeia no Governu Timor-Leste iha área ida ne’e ho objetivu atu kria oportunidade formasaun ne’ebé permite ba foin-sa’e sira hodi hetan kompeténsia importante sira iha área agrikultura no hodi kapasita sira atu sai profisionál ka emprendedór ne’ebé maka susesu iha área ne‘e.

Marc Fiedrich mós ko’alia ba apoiu Uniaun Europeia nian mai Timor-Leste iha área estratéjika adisionál sira, hanesan nutrisaun, prosesu sira adezaun nian ba ASEAN no ba Organizasaun Mundiál Komérsiu (OMK), nune’e mós jestaun finansas públikas.

Sekretáriu Estadu, Rogério Araújo Mendonça, ko’alia liu ba kompromisu Governu nian hodi fornese formasaun iha nivel munisipál hodi sensibiliza populasaun kona-ba importánsia reflorestasaun iha área ne’ebé afeta husi dezflorestasaun, liuhusi kuda ai-horis produtiva hanesan sabraka, haas no espésie sira seluk. Plantasaun ba ai-horis sira ne’e hatudu kna’ar importante ida iha prevensaun ba erozaun no rai-monu durante tempu udan no iha tempu hanesan, promove sustentabilidade ekonómika komunidade lokál sira nian.

Governante ne’e mós subliña importánsia husi programa ida ne’e nian, hanesan kontribuisaun ne’ebé iha valór hodi muda mentalidade ema nian kona-ba tesi arbiru no promove prátika kuda ai-horis ne’ebé sustentavel, ne’ebé bele apoia ekonomia lokál.

Sekretáriu Estadu no diplomata ne’e hato’o sira nia dezeju hodi kontinua iha kolaborasaun ne’ebé metin hodi garante futuru ida ne’ebé sustentavel no di’ak liu ba foin-sa’e Timor-Leste nian iha área formasaun agroflorestál.