Prezidente Repúblika kongratula Governu
Prezidente Repúblika, José Ramos-Horta, afirma katak” prezensa Timor-Leste ba dahuluk iha espozisaun internasionál (iha Xanghai, Xina) foti Timor-Leste nia naran iha mundu”.
Hafoin to’o, iha konferénsia Imprensa iha Aeruportu Dili, Xefe Estadu hahii atuasaun Timor-Leste nian ”hau hato’o hau nia parabéns ba Governu, liu-liu ba Komisáriu-Jerál Timor-Leste nian ba Expo tinan 2010 Xanghai-Xina, Agio Pereira, nu’udar responsável másimu ba grupu timór- oan ne’ebé organiza pavillaun ne’e, nune’e mós ba asesór no artista timór-oan sira ne’ebé mak hatene habelar pájina Istória no Kultura timór nian iha fatin ne’ebá. Hau hakarak hateten loloos dei’t katak, iha susesu bo’ot ba Timor-Leste bainhira tau hamutuk esforsu no empeñu Governu nian hodi realiza Expo Internasionál ida-ne’e”, hahi’i xefe Estadu.
Prezidente Repúblika nu’udar reprezentante Estadu nian, hola parte iha pavillun Timor-Leste, iha okaziaun loron Nasionál Timor-Leste iha Expo ne’e no halo mós vizita kortezia ba pavillaun sira seluk hosi nasaun balun nian hodi aproveita hametin relasaun di’ak ho nasaun sira ne’e.
