Governu Timor-Leste

Delegasaun husi Repúblika Demokrátika Timor-Leste no delegasaun husi Repúblika Indonésia ni’an, hasoru malu hodi hala'o Konsultasaun Ofisial Sénior ba Dala-ne’en (SOC) (13-14/10), iha Nusa Dua-Bali, Indonésia, hodi kontinua diskusaun konaba ba segmentu naun-rezolvidu Noel Besi-Citrana iha fronteira terrestre, Oe-cusse ni’an. 

“Ne’e prioridade xavi ba governu rua. Timor-Leste no Indonésia servisu makas hodi hetan solusaun amigável, justa, no duradoura. Ita negoseia ho boa-fé,” hatete Embaixador Roberto Soares, Chefe Timor-Leste nia Ekipa Negosiasaun Téknika, no mós Asistente Espesial ba Negosiador Chefe, durante diskursu sesaun abertura iha SOC da-6.

Embaixador haktuir tan katak Timor-Leste fiar katak delimitasaun definitiva no permanente fronteiras ho Indonésia sei salvaguarda soberania nasional, hametin tan seguransa, garante afinidade sosio-kultural, no sei lori benefísiu sosio-ekonómiku ba nasaun rua. 

“Timor-Leste konsistente tebes husi inísiu negosiasoens. Ami, Timoroan, foka no husu deit saida mak tuir lei no ho lejitimidade pertense mai ami,” hatete Embaixador Roberto.

Embaixador mós hatete katak liu loron rua reuniaun intensa no kolen, delegasaun rua hato’o sira-nia satisfasaun konaba progressu ne’ebe alkansa durante SOC da-6. Sira mos nota katak, delegasaun rua halao konsultasaun ho boa-fé, hodi hametin no asegura tan parseria estratéjika, solidariedade, no koperasaun entre nasaun rua atu liu-liu salvaguarda bem-estar populasaun sira ne’ebe hela iha areas fronteira ni’an.

Wainhira SOC da-6 remata, parte rua konkorda atu halao nafatin preparasaun téknika no prátika ho intensaun atu kompleta demarkasaun fronteira terrestre entre Timor-Leste no Indonésia, karik to fim-do-ano.