MTKI sosa produtu lokál
Governu, hahú iha fulan Jullu ne’e, sosa produtu agríkola lokál.
Anúnsiu ne’e fó sai hosi Inspetora-Jerál Alimentár no Ekonómika, Florentina Smith, iha sorumutu ida ho xefe suku, xefe aldeia, Organizasaun La’os Governu nian no autoridade lokál hosi Maubisse, ne’ebé hala’o iha sub-distritu ne’e dunik, iha loron 16 fulan Jullu.
Sosa produtu lokál, ne’ebé sei hala’o to’o tinan ne’e nia rohan, sei realiza hosi Ministériu Turizmu, Komérsiu no Indústria (MTKI), liu hosi empreza lokál ida. Produtu hirak ne’e mak hanesan: hare-kulit, batar, fore-mungu, koto, fore-keli no fore-rai.
“Avisu kona-ba programa ne’e publika tiha ona iha fulan Juñu, liu hosi órgaun komunikasaun sosiál. Empreza ka partikulár sira ne’ebé iha interese atu sai nu’udar fornesedór ba produtu lokál, tenke ba iha Gabinete Inspesaun Alimentar no Ekonómika (IAE) ne’ebé MTKI iha ba, iha Matadouru, Díli atu hodi prepara dokumentasaun no halo kontratu”, haktuir Florentina Smith.
Inspetora-Jeral hosi IAE hateten mós katak, programa ne’e nia hakarak hanesan “ tulun agrikultór sira atu hodi loke merkadu produtu lokál nian”.
“ Hau lakohi promete, maibé hau hanoin katak sei hahú husi fulan Jullu ne’e, no to’o Dezembru tinan ne’e nian, programa ne’ebé refere sei funsiona ona. Tanba ne’e, hahú oras ne’e, ami sei tún to’o iha baze atu halo diálogu ho autoridade lokál no sosiedade sivil sira. Ho forma ida ne’e, mak informasaun kona- ba programa ne’e sei ba to’o komunidade hotu” hatutan Inspetora-Jeral Alimentár no Ekonómika.
