Governu Timor-Leste

Ministru Prezidénsia Konsellu Ministrus, Agio Pereira, ohin, loron 17 fulan-outubru tinan 2023, simu delegasaun ida husi Osaka Gas Australia Pty Ltd ("OGA"), ne’ebé lidera husi ninia Vise-Diretór, Tetsuro Takebata, iha Palásiu Governu, Dili.

Osaka Gas Australia maka hanesan kompañia setór enerjia nian ida, ho investimentu signifikativu ba projetu petrolíferu no gás, ne’ebé integra iha parseria ba dezenvolvimentu kampus Greater Sunrise (Sunrise Joint Venture) nian ho partisipasaun ida husi 10%, hamutuk ho TIMOR GAP, ho partisipasaun ida husi 56,6% no Woodside Energy, ho partisipasaun ida husi 33,44%. 

Durante sorumutuk ne’e, Ukun-na’in no reprezentante Osaka Gas Austrália nian, ko’alia ona kona-ba estudu viabilidade relasiona ho dezenvolvimentu Greater Sunrise, no mós prosesu negosiasaun ho Austrália kona-ba konseitu dezenvolvimentu rekursus nian.

Ministru Agio Pereira fahe ona vizaun Governu Konstitusionál IX nian ba esplorasaun rekursus Greater Sunrise, ne’ebé afirma filafali kompromisu Governu nian hodi lori kadoras mai Timor-Leste no estabelese polu dezenvolvimentu ida iha Kosta Súl, ne’ebé konsentra iha atividade petróleu no gás naturál. 

Diskusaun ne’e diskute mós reforma signifikativa sira iha setór petrolíferu no minerais nian, ne’ebé IX Governu halo, husikedas inísiu mandatu, inklui reestruturasaun TIMOR GAP, E.P., ne’ebé aliña reestruturasaun TIMOR GAP, E.P. ne’e ho prátika internasionál sira ne’ebé di’ak liu, hodi aumenta transparénsia no kredibilidade no garante efisiénsia ida ne’ebé boot liu iha setór petrolíferu. Iha ámbitu ida-ne’e mós, Governu halo reorganizasaun ba Autoridade Nasionál Petróleu, hodi nune’e Autoridade Nasionál Petróleu foka de’it iha setór petróleu no gás, kria ona Autoridade Nasionál Minerais atu regula setór rekursus minerais no promove atualizasaun Institutu Petróleu no Jeolojia hodi hasa’e peskiza iha jeosiénsias no jeoteknolojias.

Akordu fronteira marítima permanente entre Timor-Leste ho Austrália determina katak Greater Sunrise, makrekursu ida ne’ebé fahe hamutuk, ne’ebé lokaliza iha kilómetru 150 husi Timor-Leste no kilómetru 450 husi Darwin, ne’ebé tenke fahe, ho 70% husi reseita sira ba Timor-Leste bainhira kadoras gas natural nian ne’e dada mai país ne’e, ka 80% karik prosesamentu ne’e halo iha Darwin.