Governu Timor-Leste

Iha loron 14 fulan-outubru tinan 2023, durante almosu traballu, reprezentantes husi grupu Stratacom Global, akompaña hosi Embaixadór Timor-Leste ba Brunei Darussalam, Abel Guterres, halo pontu situasaun ba Ministru Prezidénsia Konsellu Ministrus, Agio Pereira, kona-ba progresu iha preparasaun estudu ba projetu investimentu no dezenvolvimentu multi--setoriál ida ne’ebé abranjente iha munisípiu Baucau no Dili.

Enkontru ne'e inklui mós partisipasaun husi Diretór Ezekutivu GALLOPAIR, Chi Cheng, kompañia aérea Brunei nian, ne'ebé mós iha interese atu estabelese iha Timor-Leste.

Stratacom Global ne’e, mós nia sede iha Brunei Darussalam aprezenta ona projetu ambisiozu ida ne’ebé ho objetivu atu hasa’e kreximentu ekonómiku no sosiál iha munisípiu Baukau no Dili, nune’e mós iha munisípiu sira ne’ebé besik, ho konstrusaun ba kompleksu turístiku oioin, parke industriál, instalasaun ba produsaun enerjias renováveis no infraestrutura sira seluk.

Proposta ne’e inklui konstrusaun ba kompleksu turístiku modernu hodi renova setór turizmu nasionál. Atubele hasa’e ekonomia lokál, projetu ne’e prevee atu harii parke industriál hodi atrai empreza no estimula produsaun no kriasaun empregu iha país. Ida-ne’e mós inklui investimentu iha produsaun enerjias renováveis no estrasaun minerais. Projetu ne’e prevee mós konstrusaun ba infraestrutura esensiál sira seluk no oferese abordajen ida ne’ebé integra ba dezenvolvimentu, hodi garante katak iha áreas destinadas ba setores-xave, hanesan indústria, turizmu, komérsiu, servisus saúde no abitasaun.

Iha enkontru ne'e, Peter Wong destaka katak Stratacom no ninia parseiru sira sei estuda integrasaun planu estratéjiku ne'ebé propoin husi Timor-Leste iha planu mestre preliminár.

Ministru Agio Pereira hato’o ninia interese ba projetu ne'ebé aprezenta, hodi salienta katak, Governu iha ona kompromisu atu promove investimentu estratéjiku sira ne’ebé dudu progresu Timor-Leste no fó benefísiu direta ba populasaun.