Ministru Bendito Freitas partisipa iha Sorumutuk Ministeriál Forum Nasaun Arkipélagus no Illas ba da-5
Ministru Negósius Estranjeirus no Kooperasaun, Bendito dos Santos Freitas, reprezenta Timor-Leste iha Sorumutuk Ministeriál ba da-5 iha Forum Nasaun Arkipélagus no Illas (AIS Forum) 2023, ne’ebé hala’o iha Bali, Indonézia, iha loron 10 fulan-outubru tinan 2023.
Ho tema “Promove Kolaborasaun, hodi Permite Inovasaun, Ba Ita-nia Oseanu no Ita-nia Futuru”, sorumutuk ne’e konsentra liu iha dezenvolvimentu ekonomia azúl, iha dezafiu sira ne’ebé kauza husi alterasaun klimátika no solidariedade entre Nasaun arkipélagus no illas. 
AIS Forum maka plataforma ida ne’ebé kria hodi inklui país illas no país arkipélagus, la haree ba ninia rejiaun, dimensaun no nivel dezenvolvimentu nian. Inisiativa globál ida ne’ebé halibur nasaun arkipélagus no illas hamutuk 51, hodi partisipa iha forum koletivu ida ne’ebé ko’alia kona-ba dezafiu sira ne’ebé relasiona ho utilizasaun ba rekursus mariñus ho sustentável ba kreximentu ekonómiku sustentável, reziliénsia ba mudansa klimátika, poluisaun oseanu, jestaun emerjénsia no reforsu ba peska sustentável.
Durante eventu ne’e, Ministru Bendito Freitas, afirma katak “partisipasaun Timor-Leste iha Sorumutuk Ministeriál ba da-5 iha Forum Estadus Arkipélagus no Illas ne’e ho objetivu atu kontribui ba diskusaun sira kona-ba seguransa ambiente mariñu mundiál no uzu sustentável ba vida mariña ba jerasaun futura, hodi hanoin katak ameasa oioin ne’ebé mosu husi alterasaun klimátika globál, ne’ebé provoka beibeik alterasaun boot ba padraun meteorolójiku, ne’ebé nia konsekuénsia maka lori dezastre ba umanidade”. 
Governante ne’e defende katak “fortalesimentu ba kooperasaun entre Estadus Arkipélagus no Illas bele kontribui hodi prevene ameasa kontra vida mariña, hodi asegura pás no seguransa iha Estadus Arkipélagus no Illas”.
Bendito Freitas afirma katak, “Timor-Leste iha Governu Konstitusionál nia okos ne’ebé lidera husi Sua Exelénsia Primeiru-Ministru Xanana Gusmão, kompromete ona atu koopera ho entidade internasionál sira hotu, inklui Estadus Arkipélagus no Illas, hodi hasoru dezafiu komún iha tinan hirak tuir mai.”
Iha ámbitu AIS Forum 2023, Primeiru-Ministru, Xanana Gusmão mós partisipa iha Sorumutuk Altu Nivel Dahuluk, hodi hametin kompromisu Timor-Leste nian ho kolaborasaun globál hodi hasoru dezafiu komún no alkansa dezenvolvimentu sustentável no konservasaun mariña.
